Maiava Viiga

E lei atoa se vaiaso talu ona alu le solaaga tele a pagota mai le Falepuipui i Tanumalala ae tuli ese loa e le Komesina o Leoleo, Su’a Fuiavailili Egon Keil le ofisa sili lagolago o le Falepuipui i Tanumalala le susuga ia Maiava Viiga Fuimaono, lea e oo mai lava i le taimi lenei e lē o toe faigaluega lava.

I se feiloaiga a le tatou nusipepa ma le susuga ia Maiava na ia faamatala ai le faate’ia o lona tagata i le tulai mai ai o lenei faafitauli, ina ua faia ai le faaiuga faatopetope a le Kapeneta e toe ave ai i lalo o le vaaiga a le Komesina o Leoleo le Falepuipui i Tanumalala. Na agai atu ai le Komesina o Leoleo ma sui o le pulega a le Matagaluega a Leoleo ma feiloai atu i le pulega o le Falepuipui i Tanumalala, na faailoa atu e Keil lana pulega ma ia talosaga ai e fia alu sana asiasiga i totonu o le Falepuipui. Saunoa Maiava, na ia talosaga i le Komesina pe iai se avanoa e faailoa atu ai le latou foi pulega o le Falepuipui ina ia malamalama uma vaega uma, i nei mea ane ua tulai mai ai ni feeseeseaiga i le lumanai. Ta’ua e Maiava, o lana ia lea faamalataga na fai ma e foliga mai na tuuina atu i se auala mālie ma na talia foi e le Komesina o Leoleo.

Saunoa Maiava e iai lona talitonuga o lana talosaga na tuuina atu i le Komesina i se auala mālie na pei e lei fiafia ai le alii Komesina. Na sosoo ai ma le asiasiga a le Komesina o Leoleo i le falepuipui, peitai, o le faaiuga o lea asiasiga, na saunoa sa’o atu ai lava le Komesina o leoleo ia Maiava, e na te lē taliaina le ituaiga o amio e pei ona ia faaalia muamua. Ta’ua e Maiava, na faate’ia o ia ma ia faamālūlū ai i le Komesina, peitai, na faatonu o ia e le Komesina e aua ne’i toe tali atu seiloga e fai mai ona faato’ā tautala atu lea. O i tonu lea na ese ai ni lagona o Maiava, na saunoa foi Keil afai e te fia faamavae ona faamavae atu lea, peitai na tali Maiava e leai se mafuaaga o le a ia faamavae ai. Toe saunoa le Komesina e mafai ona ia faamālōlō o ia mai lana galuega, na toe tali Maiava, o lana lea faaiuga, lea na fai loa i ai le Komesina e tapena ana meatotino ma alu loa i le latou aiga.

E lei toe faatali Maiava ma ua ia manatu foi i le filemu, lea na ia tapena gūgū lava lana ato ma tuua loa le ofisa. O le manatu o Maiava, o ia e lei iai sona manatu e faavevesi lenei mataupu ona o le taimi lea o loo pagatia le atunuu aemaise o le Malo i le sailiga o pagota na sosola ese mai le falepuipui. E oo mai i le taimi lenei o loo nofo pea Maiava i le fale ae o loo maua pea lona totogi, ma e lei iai foi se tusi aloaia ua tuuina atu e faailoa atu ai le isi laasaga ua oo i ai lana galuega.

O tuutuuga lava ia o ia ituaiga o galuega e leai se malosiaga o le Komesina o Leoleo e mafai ai ona ia faamālōlō se ofisa sili lagolago o le Falepuipui, seia vagana ua tuuina atu sana fautuaga agai i le Kapeneta ona faamālōlō lea. Ae na faailoa e Maiava, e leai sona lagona e toe fia foi e galue ai i le falepuipui ona e puipui foi o ia i ona lagona faaletagata aemaise ai o le la va ma le alii Komesina o Leoleo. Ua mae’a foi ona tuuina atu lana tusi faatoese agai i le Komesina e faamaualalo ai i ona uiga na faaalia i lea aso. Saunoa Maiava, e tasi lava le naunautaiga o lona loto i le taimi lenei, ia faafilemu le mataupu ona e tele atu isi mea tāua o loo ave i ai le faamuamua a le Malo e pei o le Koviti-19.

Ua mae’a foi ona feiloai atu Maiava i le Minisita o Falepuipui, le Afioga ia Tialavea Fea Tionisio Hunt ma faailoa i ai lona manaoga ina ia aumai se taimi e faamavae lelei atu ai ma lana galuega ona alu mamā ma filemu lea mai i lana galuega. 

Fai mai Maiava, e toatele nisi na fautuaina o ia ina ia ave le mataupu i le tulafono ona e lei mae’a le taimi o lana konekarate peitai na saunoa Maiava, e mamao lava lona mafaufau mai i lea faaiuga, ae sili ia te ia, ona alu e totō sona ma’umaga atonu e iai foi se isi galuega e faaaogā ai lona ola e le Atua.

O Maiava Viiga Fuimaono sa amata galue ai i le Falepuipui i le masina o Ianuari o le tausaga na tea nei, o se tasi o sui ofisa sili e gafa lea ma le faatautaia ai o polokalame toeafua mo pagota poo Faatonu o Polokalame. Pau le manaoga o Maiava o iai nei, ia alu ese fiafia mai lana galuega ona ua mae’a foi ona ia faamagalo i le Alii Komesina o Leoleo, e leai foi sona naunautaiga ina ia tali mai le Komesina ia te ia, ae o le mea sili ua mae’a ona faia lana galuega ma lana pitolaau ina ia faamalieina ai lona tagata ma ia maua ai sona filemu mai le Alii. 

O le a taumafai le tatou nusipepa ina ia maua se fesootaiga ma le Komesina o Leoleo ia Su’a Fuiavailili Egon Keil i le tatou lomiga o le vaiaso fou e faatatau i lenei mataupu.