“Oi ou te lē faamagaloina se faatoesega. Auā e lē toe aumaia e le faatoesega lena lo’u toalua.”
O fasaga o le fatu ua nutimomoia, o le mafutaga ua faafuasei ona motusia, o se aiga na tau atina’e mo se manuia o laua ma lo la aiga i le lumanai ae ua faamuta e le oti, ina ua fasi faamo’amo’a e se kegi o tamaiti talavou o feoai i le taulaga i Apia, ma maliu ai lava le manamea faapelepele a le tamaitai o Shine Taei Meli, o le alii mai Saina, o Charles Chao Cao.
Ua lē toe saogalemu le taulaga o Samoa, i kegi a tamaiti faomea o loo feoai ai. O lagona ia o se tasi o paaga a le Tusitala, na te iloa ma faalogo soo lava i amioga a tamaiti poo kegi ia o loo feoai i le taulaga, aemaise o le po e sasao ai, e pei ona molimauina nei i le maliu ai o Mr Cao. O le alii Saina e faigaluega, faiaoga Volunteer i le Kolisi o Samoa, i tomai manaomia e fanau aoga a Samoa. O Volunteer Saina nei poo tagata galulue fua e lē totogia, o loo aumai e le malo o Saina, o se vaega o le latou fesoasoani i atunuu tau atinae e aofia ai ma Samoa. Ina ia siitia ai le tulaga tau a’oa’oga mo se Samoa sili atu i le lumanai.
E leai se tupe a le tatou atunuu e alu ai, e totogi uma lava e Saina, fale e nonofo ai a latou Volunteer, mo le umi e galue ai iinei. Ma manuia ai le aufaifale Rent, poo faletalimalo i nei alagatupe tetele, auā e silia i le ta’i afe tala i le masina le totogi o apitaga.
O le manaoga o le alii o Charles sa iai, i le faamatalaga a lana manamea, “ia toe talosaga e faaumiumi le taimi e nofo ai i Samoa. Ona ua sologa lelei lana nofo, ma ua faia foi a la fuafuaga tau pisinisi i le lumanai e faia i Samoa. E masani lava ona maualuga lana talanoa ma lana vaai i le tatou atunuu, e fai mai lava ia o Samoa o le Parataiso.”
E oo mai lava i le taimi na tusia ai lenei tala, e melotagi lava le tamaitai ma faamatala, le mea na tupu. O ia sa alu e faatau a la mea faatau masani ai, e faifai lava nai tamai pisinisi, pei o le faatau o a la fualaau’aina ma alu foi faatau le la oka i’a i le taimi o Bingo.
O le po o le Aso Faraile sa faatau le la oka i le Bingo, ae alu lana manamea e savalivali e faatalitali ai le taimi e uma ai le la oka, ona alu lea e piki mai. Sa tuu le taavale ia te ia. Sa fai lava la ma fesootai laua i luga o le telefoni, e iloa ai le mea e piki ai. Peitai e tea laititi le 9pm, ae vili mai Charlie ia te ia, ma pue mai le ata o le mea la e iai, e foliga mai o le taligalu, ae lē o iloa tonu poo gafea tonu le taligalu.
O le la talanoaga mulimuli na vili mai ai e piki ia, ae ou te faalogo atu i le background e foliga e iai ni tagata o loo lagona atu o latou leo i tua atu. Ae lei umi lava ae pe mai le telefoni ma lē toe maua loa se ma fesootaiga, ae ua lē maua lelei atu foi poo fea tonu e piki ai. E lē masani ona alu Charlie e savali i le taligalu lea na maua ai. E alu lava i le mea e tumu ai tagata, ma iai moli e faitau ai lana tusi. Pei o le paka a tamaiti i Sogi.
“Na umi se taimi o o’u taumafai e toe vilivili lana telefoni, ae ua lē tali mai lava ma ou lagona ai loa lo’u popole. Na ma o loa ma lo’u tina e saili, ua soo mai tai i le taligalu i Mulinuu, ma faasolo i mea ou te iloa e masani ona alu iai. Sa toe sue i le mea e masani ona eva ai ma isi ana uo Saina, e leai lava. Ua faasolo lava ina leva le po, ae o loo ma feoai lava ma lo’u tina e saili. Ua logo foi leoleo.
E iai le tagata na ia viliina leoleo, afua ai loa ona maua e le siaki masani a leoleo i luga o maa o le taligalu. Sa leai ma so’u manatu pe tau foi so’u mafaufau, e alu Charlie i le taligalu, lea i tua ane o le fale o le malo, lea na maua ane ai. Ae o le ma sailiga ma lo’u tina na ma iloa atu ai moli o taavale a leoleo, ma ma’ua soona o atu lava iai. E taunuu atu le ma sailiga, o loo iai leoleo, e lei leva foi ona latou maua, ona o le tagata na vilia leoleo ma ta’u iai le Saina lea e tupu ai le faalavelave. Ma te oo atu, e foliga mai e lē o iloa lava poo ai lea tagata, ae na ou alu atu sa’o lava e vaai, o Charlie.”
“Sa ou ta’u loa i leoleo o lo’u to’alua, lea na ou suea talu mai le 9:08pm na vili atu ai e piki ia, ae ua pe atu le telefoni, ua lē mafai ai ona iloa tonu poo fea o iai. Ou te taunuu atu, e saofai lava i luga o maa o le taligalu, e pei na faasaofai ai, faalagolago i luga o le ‘alā ae ua gau i tua lona ulu, ae ua lē iloa ona foliga i le palapala, ma ua fulafula ona mata, oka se faigata, o la’u vaai atu ua oti.”
“E matuā tugā lava aafiaga o si o’u toalua, i lona ulu ma lona tino atoa. O loo ofu lava lona ofuvae, ae o lona mitiafu ua sisi ane i luga i lona fatafata. O le taimi lena pe ua tea le tasi i le vaveao o le Aso Toonai, ua faasolo i le lua ae o loo matou iai lava i le taligalu ma leoleo ma avatu ai loa i le falema’i.”
“E toatasi le tamaitiiti la e taofia e leoleo mo a latou suesuega, ae mo le taimi nei, ua tele lava faamatalaga na maua i la’u lava suesuega na faia talu mai le Aso Toonai. Sa ou toe alu i leoleo i le aoauli o le Aso Sa e avatu iai faamatalaga fou ua ou maua, ae faapea mai leoleo ou te toe alu atu i le Aso Gafua, ona e lē o faigaluega tama o loo gafa ma la’u mataupu.”
E tagi tagi lava le tamaitai ma ta’u ane lana fasa, i ona lagona tiga o feagai ai nei ma ia, “oi e leai ou te lē faamagaloa tagata nei na fasiotia si o’u toalua.”
