O le lisi o fanua faaleaganua o se faiga lelei tele, ma o se faiga e fesoasoani ai i itu tau tamaoaiga o le atunuu, o le mau lea a se tasi o sui o le atunuu o loo ia finauina ma mata’ituina manatu ma finagalo i le toe teuteuga o le tulafono o Fanua ma Suafa 2008.
O le afioga Fiu Mataese Elisara e lē solomuli lona manatu i lona popolega i le tulaga e oo iai fanua faaleaganuu o le atunuu pe afai ae pasia le tulafono o le LTRA 2008. “O le mea muamua e faamanino e leai ma se matou tetee i le mea tau lisi, o le lisi o fanua faaleaganuu ua leva ona faatino talu ona pasia le Alienation o Fanua faaleaganuu i le 1965.”
“O le matou popolega, o le lisi lea o fanua i lalo o le Torren System. E lisi loa lou fanua i le faiga fou lea, o le igoa lava o loo tusia i le pepa poo le Certificate of Title, e pau na o le tagata e ana fanua lea e aafia i le lisi.”
“O lona uiga afai o le igoa o le Sa’o lea ei i luga o le Certificate of Title e pau a lena o le igoa e amanaia e le faiga fou lea. O lona uiga e na’o le igoa o le Sa’o ma lana fanau ae misi atoa le aiga potopto, e lē aiā iai.” Saunoa Fiu “o aso ia, e leai se popolega ona na manino lava le tulafono na faataatia mai e tatou tuaa, soo se mea lava e aafia ai le Sa’o e tau fai aiā tutusa uma iai le aiga potopoto. Peitai o lalo o le faiga fou lea e leai se mea faapea.”
“Lona lua, i lalo lava o le tulafono fou, ua mafai e le malosiaga o le Minisita ona ia faia le faaiuga i se fanua faaleaganuu e lisi atu i se isi poo se kamupani e aunoa ma le fesootai atu i tagata e ana le fanua faaleaganuu.” “O le matou talitonuga, e tatau lava ona feutagai sa’o tagata o le aiga ma le tagata la e manao i le lisi poo le sui o le kamupani o loo fia lisiina le fanua. A totogi, ona totogi sa’o lea o le lisi i le Sa’o o le aiga ona alu lea o le Sa’o e faasafua i lona auaiga.”
Peitai o loo manino le itu a le malo, e leai se mea e atugalu ai fua i le faiga fou o le tulafono e aafia ai le Torren System. “O lea e fai mai le malo e leai se mea e popole ai o loo puipui i lalo o le vaega o le faavae o le 102, ae manatua, o loo iai le avanoa i lalo o le 102, e mafai ai e le malo ona o latou ave faamalosia fanua faaleaganuu mo le puipuiga ma le leleiga o le atunuu lautele.”
“Pau sina vala, e le o mafai ona manino mai poo o le ā le tele o le fanua latou te ave mo le leleiga o tagata lautele, tai pei la o le mea lea na tupu i Salelologa lea na o le malo ave fanua mo le faamoemoe mo se taulaga i Salelologa, e toeititi 3,000 eka na ave, mulimuli ane ua faaaogā e le malo na’o le 400 eka.”
O le faanaunauga i le finagalo o le tofa ia Fiu, ia lava le malamalamaga o tagata o le atunuu i le mataupu e pei ona lotea nei. Na fetalai foi Fiu, o le mea tāua ia malamalama le atunuu i le mataupu o loo taumafai iai, auā e lē tatau ona pogisa ai nisi, auā o le iuga pe a lē malamalama o le toe feosoi atu ae ua pei Samoa o Hawaii ma isi atunuu o le Pasefika, ua faoa o latou eleele, e faigata foi ona toe finauina.
O vaega e pei ona fetalai iai Fiu, o loo faavae ai finauga a le SSIG ua tuuina atu nei i luma o le faamasinoga, e ala i le latou su faasaga i le tulafono LTRA 2008.
