E ui lava ina tele finagalo faaalia i le tāua o le gagana muamua a le tamaitiiti mo le agai i luma o lona aoaoina, oloo tele lava mātua oloo manatu e tatau ona a‘o le Igilisi. A leai le Igilisi, ua lē aogā mea uma.
O nei polokalame oloo faaaogāina ai le gagana Samoa ma le Igilisi, e tele ni suesuega sa faatinoina e le toatele o polofesa o gagana, ma latou molimauina ai le tāua tele o le mautu o le gagana muamua a le tamaitiiti, ona e faigofie ai ona faaaogāina le gagana lona lua, e aoao ai mataupu o le aoga.
A lelei ma mautu le gagana muamua a le tamaitiiti, o le mautu foi lea o ona lagona, ma faatāuaina lona aiga, o ana tu ma ana aga, ma lona faasinomaga.
O le auala foi lea e mafai ai ona fesootai atu i isi tagata ma malamalama ai i uiga eseese o tagata.
Ma faia ai ni faigapaaga lelei e maua ai se siosiomiaga saogalemu ma le toafilemu mo tagata uma.
O le manatu maualuga foi lea o le tamaitai minisita o Aoga ma le Matagaluega mo tagata Pasefika, ia avea le gagana, tu ma aganuu, ma le faasinomaga, o le ogatotonu o fuafuaga i soo se aoga.
O lau gagana muamua o lou ala lea i malo, o lou tofi mai le Atua.
