E lē o tuuitiitia le poloka o auala

Talu mai lava le faamamaluina o le suiga o le itu auala e feoai ai taavale i Samoa, ua matauina ma le toto’a e le toatele tulaga o iai faalavelave i totonu o le atunuu.
Ua iai faalavelave ae e lei oo i le numera maualuga lea sa iai le popolega e ono tulai mai ina ua suia le itu e tu ai le foeuli o soo se taavale i Samoa aemaise o le suia o le itu o le alatele e faimalaga ai.
A o matauina ai le tulaga saogalemu o luga o alatetele, ua manino foi le faatuputupulaia o le numera o taavale ua i Samoa.
O loo faatino foi le galuega faaleleia o le alatele – o se atinae tele ua silia ma le tausaga o faatautaia ma ua faaauau ai pea le poloka o le auala i le taimi nei.
E amata lava i le fitu i le taeao le tumutumu o auala agai mai i Faleata agai i le taulaga ma le agai mai i le Vaimauga.
O magaala uma o le Vaimauga i le agai mai i le taulaga ua taumafai le tele o avetaavale e alofia ona ua pei o vaaiga i Niu Sila ma Ausetalia i taimi pisi o alatele e oo lava i le itula o faatali le minoi o le laina o taavale.
Faaalia e le Matagaluega o Galuega e umi se taimi o faatino galuega faaleleia, ona o loo faamoemoe foi i le lagolago a aiga ua oo atu i ai galuega talu ai ua iai afioaga e taofi e aiga le faaauau ai o galuega ona o le lē fiafia i le faalautelega o nisi o vaega o le alatele.
Ua silia i le tolu tausaga o faatino feutagaiga a le Malo ma aiga o loo aafia lumafale i lenei faalautelega o le alatele ma o loo totogi aiga i vaega o o latou eleele ia o loo faaaoga aua le faalautele ai o le alatele.
O le galuega i Malifa na amata mai i le Lotu a Tamaiti i le tausaga na te’a nei ma o loo tau faagasolo lava ona o loo tele le galuega o loo faia i alavai ma le toe eli ai o le pa o loo si’o ai le lotoa a Malifa.
E lei mae’a lava la lea galuega.
O le itu i Faleata o lea ua oo mai le galuega na amata mai i Vaitele ma ua oo mai i Vaimoso ma faasolo mai ai i Vaimea ma o se galuega tele foi lea ua vaaia ai le faigata ona tau faaofiofi taavale i feoaiga masani ai.
O le tulaga mautinoa e mae’a loa galuega nei ona vaaia loa lea o le tau tuuitiitia o le poloka o le auala.
O le isi lava itu e pei ona faamautu mai e le Komiti o Taavale Afi ua silia i le 500 le faaopoopoga o taavale afi mai i Niu Sila ma Ausetalia ua i Samoa talu mai le suiga fou ma ua faaopoopo i le numera o taavale i totonu o le atunuu.
O se faasiliga lenei ua matua moomia ai le faalautele o alatele e pei ona iai galuega nei o loo tau tolotolo lava le faatinoga i auala o le talafatai o le taulaga.
Ua faapea foi ona vaaia le tuai o galuega ona o le faaletonu o le tau, i le susū o le alatele ma le siisii ai o le vai i luga o le alatele i nofoaga e lei faaleleia alavai i totonu o Fugalei ma isi itu o Saleufi.
Ua mae’a galuega i Savalalo lea foi na alu le lua masina o faatautaia ma ua tau tuuitiitia ai le suavai to’a i taimi o timuga.