O le toatele o tagata na logotala ma afea lea itulagi i le pitonuu o Darra, ona o le lolofi atu sei maimoa ise tasi foi o aitu tauatia’e, aua e ta’u loa le itupa lea, e mautinoa lava o le fiafia e maua ai ma le ‘ata.
O le po ole Aso Toonai na sei mavae atu nei, na tatala aloaia ai mole uluai taimi muamua le faafiafiaga ale susuga ia Tala poo ua lauiloa ia Jarvis. Ua tele nisi o faamoemoe sa auai Tala e mautinoa lava le taliē o tagata.
O nisi tagata e filogia lagona i mafatiaga ma faanoanoaga, ae avea Jarvis e faanofo filemu le popole ma le atuatuvale. Ua tele ina silafia e le toatele o i latou i Kuiniselani le susuga ia Tala ona e lagolago tele i faamoemoe aemaise ose tagata e osi aiga tele e le gata o Ausetalia ae faapea foi si ona aiga i Samoa, e tele foi ana uo.
Na ta’ua e Tala e tele ulugalii sa tau masu’esu’e ma lealea laupepa o mafutaga ona o uiga faaalia lava o le alii o lenei lalolagi, peitai o ia lava le fofo o faafitauli ma ua mautinoa le sologa lelei e oo mai ile taimi nei, aua o Tala lava na te paepae maa ua tau solofa i lalo ma faalauleleia ala gaoā o mafutga ua tau faaletonu.
“E le o se tagata faatupumisa po o maseiga le tagata lenei, ae oute masani ile faafiafia ma faa’ata tagata um, oute ofo ise tagata e avea a’u ma ona fili” o le saunoaga lea a Tala ma ‘ata ne’e. O lea tagata e muliga foi le vavai o tino o le tausala pe a saasaa, pe a se’e mai ile siva Samoa, e mata’ina ile silasila ale tele o tagata.
Ua faamoemoe o le isi ana faaaliga lona lua ua fuafua mo le masina o Oketopa ma ua fuafua e auai mai ai ni malo faaaloalogia mai Samoa, Niu Sila faapea ma Ausetalia nei. O lea foi faaaliga ua fuafua e fia tufa atu ana valaaulia, ina ia mafai ona auai mai le tele o nai Tamā ma Tinā matutua aemaise lava ile aunofo toatasi aua e iai se taua tele mo latou e maua ai lo latou fiafia moni pe a oo ina faailoa ana taleni ole faafiafia.
Na saunoa Tala, “oute talitonu ma le mautinoa, e mamago ivi ile faanoanoa a o le fiafia ose vailaau aogā lea.
O le a iai ni ausiva o le a kovāina ana faaaliga ina ia fesuia’i vaaiga o lea po. Na tele le lagolago a aiga ma uo aemaise ole susuga ia Kolisi ma le Tautai Band na mafai ona faaleoina ma faapa’o musika malie na faatinoina ai ana faaaliga matautia. Na auai foi le susuga ia Lealaifola Lui ma le faletua ia Leigh Savelino (Top Fencing) ma nisi ona o le fia maimoa lava i tala aave o Tala.
O le tofa ia Tuitumua Pio Amoa sa fai ma fofoga o le po. E faaleo atu ai se agaga faafetai o Tala mo i latou uma sa auai mai ma maimoa lana uluai faafiafiaga aemaise le lagolago a ona aiga.
Faafetaia foi le susuga ia Kolisi Leota ma le faletua faapea le faaili lauiloa ale Tautai Band ua logo leleia ai leo eseese o le po.
