O Tia, o se tamaitai e ese le aulelei, mai lava i lona laititi seia faasolo ae ina matua ma oo atu ana aoaoga i kolisi maualuluga. Ae ona o se teine e usitai tele i ona matua, e le taitai ai lava ona tosina gofie Tia i taaga a isi ana uo i le aoga, lea e tele ina mitai ane a latou tafaoga ma a latou uotama i afiafi.
O nisi teineiti e manatu faapea, ai ona o le lapoa o Tia, ma lapoa i luma lona fatafata, ai o le mea lea e le fia mananao ai tama i si teine, aua e ula le toatele o tamaiti i taimi uma e savali ai Tia i totonu o le aoga, aua o tamaiti uma e faafafa a latou ato i le patua, a o Tia, a le o le fafa mai o le ato i luma i le fatafata, poo le afisi uma ai o ana folders iina, ma ua mateia uma lava e tamaiti le mafuaaga e ala ai ona fai faapea e si teine.
Ia o na aso sa pei e fai tala a fafine ma loomatutua e peiseai e lau ai le tautalaititi o se teine talavou pe afai e faapena le tupu fefete o luma i lona fatafata, aemaise lava pe afai o se tamaitai laititi e lei faia se aiga. Ua ese lena mai nei aso, e pei o se mea fiafia a le fanau teine toeititi lava oo i teineiti e lei atoa ni sefulu tausaga, ua fiafia e faaaliali luma i le fatafata sei tulou.
Peitai e foliga o le mea lena sa pei se avega mamafa i si nei teine talavou o Tia, e ui lava ina iloa e le toatele o ana uo, ona pau lava o lona ia fuaitino na tupu ae ai. O le isi la aso i le aoga, ua faateia uma uo tamaitai a Tia, ina ua alu atu le teine ma lana tala fiafia, ua fia uo atu le alii o Sinapati, lea sa avea muamua ma taitaiulu o tama, i se tasi o kolisi sili ona tautaua i Samoa, ae ua faigaluega nei i le ofisa o le tiute i Apia, ma na matua ese lea aso i le mimita o Tia a o faamatala lana story i ana uo uma nei ua na o le faalologo.
Ua auiliili uma e Tia le amataga o le faigauo. Fai mai leaga o Sinapati sa tausaga faatasi ma lona tuagane i le kolisi, sa la taitai faatasi foi, ae o lea na alu Sinapati fesilisili solo i isi ona tei pe iai se auala e mafai ai ona fesootai mai ia te ia, leaga ua leva ona fia uo ia te ia, ae le iloa pe faapefea ona talanoa mai.
O le aso la lea, ua faateia Tia, i le vili mai o Sinapati i le latou telefoni ma amata faatalanoa ai loa o ia. Ia o ai o le a le fia uo i le taitaiulu o le kolisi.
Ua matua tafe faua o le autamaitai lea e faamatala i ai le love story a Tia, ma o aso uma lava i le aoga, na ona fia ta lava o le malologa, faapotopoto uma le vaega i lalo o le pulu i autafa o le potu e fai ai le faasaienisi, ae sosoo foi tala o le faigauo fou lea ua amata a Tia ma Sinapati.
O le mea lea e iai le faigauo, e na o luga lava o le telefoni lea e fesootai ai, ona e fai o le matamuli o Sinapati ina nei iloa ane e le tuagane o Tia le uo lea ua fai, ae o le fefe ma le matau foi i si teine nei iloa e lona tama saua, ona toe vave faamuta lea o le mafutaga.
