O se finagalo lea ua faaleo e le sui sooupu o le afioaga o Satapuala, e tusa o lafoga a le Alii Palemia i le poloka ai e nisi o sui o le afioaga o le auala e faafesagai ma le malaevaalele i Faleolo. Na ta‘ua e le alii Palemia o uiga faafufu‘a ma faapuaaelo nei e lē talia e le Malo.
O le poloka ai o le vaega o le alatele a le Malo o se solitulafono e pei ona toe faamanatu e le taitai o le Malo, ma e pei ona faamatala e le alii Palemia i totonu o le Palemene, ua matuā leai se eseesega ma uiga faaterorisi poo uiga faafouvale. “Ua fatu le pa i maa, ua taofi taavale a le mamalu o le atunuu ma faasusulu moli uila i totonu o taavale ma na taofia ai le taavale a le Faamasino Sili, taofia ai le taavale a le Fofoga Fetalai ma le anoano o tupu ma e‘e o Samoa aemaise le lautele o Samoa,” o se faamatalaga lea a le Alii Palemia.
O ni uiga na ta‘ua e le alii Palemia ua oia ai le aiā tatau a tagatānuu o Samoa e feafioai ai ma le saolotoga ua o latou maua e faia ai ia gaioiga. Ae o i latou na faia nei uiga na ta‘ua e le alii Palemia ua na o se vaega o le afioaga o ni taulelea ua ufi mata i ie ae ua faaauupegaina i laau malosi ma agaese ma na iai ma matai na molimauina sa i autafa o le alatele ma faapea ona matau mai gaioiga ia e fai. “E lē o ni puaaelo Satapuala, o le nuu tofi, o le nuu mavae e iai ona faalupega ma e lē o se nuu taliola,” o se saunoaga lea a Vaili Mimita, o le sui o le afioaga o Satapuala. Na ia faaalia foi, o saunoaga tuulafoai ma le lē migao a le alii Palemia ua ia lafo ai le faasausili i tupu ma e‘e o Satapuala, e lē tuu māmāina e le afioaga ona e lē o se nuu faataatia.
“Silasila ane, o fea o iai le tofa ma le faautaga i le alii Palemia, ua soona tuulafoai mai ai ana malelega i le nuu ae o loo faafofoga foi le atunuu atoa? Faamalulu atu Samoa, ae e lē tuulafoai e Satapuala saunoaga ia,” o se saunoaga lea a Vaili e tusa o le finagalo o le afioaga.
Na saunoa foi Vaili e tusa o le oo atu o le Matagaluega o Leoleo ma faatino le latou faamoemoe, o le faapāpā a latou fana. “O le tafanaina lea o ulu o Satapuala,” o se faagaulemalie lea a le afioaga agai i le Matagaluega o Leoleo.
E ui o lea itu, ae sa faafetaia e le sui o Satapuala le Komesina o Leoleo ona sa oo atu ma talanoaina le mataupu i le faatinoina o le galuega mo le falemai ae peitai, o le alii Palemia na saunoa i le taitai o le Matagaluega ma ua faataunuu ai lea faiga o le faapāpā o fana i totonu o le afioaga o le faamoemoe foi lea o le Malo. O le mau a le Malo o le faapāpā o fana i le ea ina ia faata‘ape ai i latou ua faaaupegaina i laau malosi ma agaese ma o lea na faaauau ai loa leoleo e aveese maa nei na fatu ai le pa e taofi ai le alatele ma amata ai loa ona agai i le nofoaga lea e fia fausia ai le falemai faaitumalo mo le amata aloaia o galuega ua tele vaiaso o taatia ona o le tetee a le afioaga o Satapuala.
Mo le mataupu i tuua‘iga e faasaga i le sui faipule o le Itumalo Aana Alofi Numera 3, sa faamanino mai e le afioaga lea itu. E faapea se faamatalaga, sa oo atu Toesulusulu Cedric Schuster i le taeao o le aso na oo atu ai le Matagaluega o Leoleo ma talanoa i le afioaga.
“Vaili ma le Fale Aana, ia to‘a le tai, aua ne‘i tulai mai se faalavelave,” o se saunoaga lea a le sui faipule agai i sui o le afioaga.
O le mataupu foi na tulai mai, e lei iai se fuafuaga a le afioaga e faia ni gaioiga faasaga i le alii Palemia, na o se talosaga na laga ina ia mautu ai le vaega o le a faatino ai galuega mo le falemai ae ia taatia atu pea tuamaota mo le afioaga ona ua ola ma toatele le tupulaga ua ola a‘e.
A o lei tulai mai le mataupu na oo atu ai Leoleo mo le amata suaina o le fanua mo le galuega o le Falemai, sa feiloai sui o Satapuala faatasi ai ma sui o Ekalesia Soofaatasi i le maota o le taitaifono le Peresetene o le Ekalesia Metotisi i Samoa.
Sa feiloai foi le afioaga ma ana ‘au fai tatalo i totonu o le afioaga, ma o le ala lea o le leai o se gaioiga a Satapuala e tali ai le faamoemoe o le Malo.
O fanua ma eleele lava o loo finau ai le afioaga, e mafua mai ona ua tupu le nuu ma e manaomia le toe faafoi atu o isi vaega e nofoia e le afioaga ma galueaina. Na ta‘ua foi e Vaili, o fanua o loo ua iai nei le malaevaalele, e lē o toe iai se faamoemoe o Satapuala e toe faafoi atu, ona o lo latou sao lea i le Malo, o le atunuu ma le lalolagi atoa i le itu tau femalagaiga.
O se tasi itu na tali mai i ai le afioaga i se feiloaiga ma tusitala, o le faamalolo ai o lo latou pulenuu e le Malo, le susuga ia Ga Sakaria. Ua faamautu mai e le Malo ua faamalolo Ga Sakaria ma o le lē mafai ona tulai mai o ia o le sui o le Malo i lenei mataupu ua mafua ai le faaiuga a le Malo. E tusa ai ma se saunoaga a le alii pulenuu, na ia ta‘ua ai, e lei iai sona agaga e ‘au i le itu a le nuu poo le itu a le Malo ona sa faatino lava lona tiute faalepulenuu.
“O le Aso Tofi, 16 o le masina nei, sa omai ai sui o le Matagaluega o Tina ma Tamaitai e faaoo mai le tusi, ae o le aso lea na vevesi ai i le oo atu o le Matagaluega o Leoleo, lea sa tuu ai i se taulealea o le nuu le tusi lea, ma faato‘ā oo mai ia te au i le afiafi o le Aso Faraile,” o se saunoaga lea a Ga.
O lea tusi, o loo faailoa atu ai i le alii pulenuu le faamalolo o ia mai ona tiute faapulenuu, ma na ta‘ua e Ga e leai se mea e afaina ai, e faatino pea ona tiute faapulenuu mo lo latou afioaga ae lē toe auai mai i fonotaga ma feiloaiga masani a pulenuu ma le Malo.
E tusa ai ma faamaumauga a le alii pulenuu, o loo ta‘ua ai, e 867 matai ua mae‘a ona resitala ma o loo fai nuu i totonu o le afioaga ma e lē o aofia ai matai o loo nonofo i isi nuu ma atunuu i fafo.
