E LĒ O KERISO LONA FAAIU Luka 4:18

Fesili i le isi alii poo ai Keriso, ae tali, o le faaiu o Iesu. Sese. O Keriso e lē o se faaiu o Iesu, Keriso e faamatalaina Iesu. Upu Keriso e sau mai le gagana Eperu (Mesia), o lona uiga o lē ua faauuina. Faatatau i lona tulaga faauuina, a o lona faauuga e mamana.

O le Feagaiga Tuai, e faauu tupu ma ositaulaga ia iloa e tagata ua filifilia e le Atua. O Iesu e iai le pule ma le mana Atua e faataunuuina perofetaga. Faamatala e Isaia 10:27, “o lea aso foi e aveesea ai lana avega i lou fūataua, ma lona amo foi i lou ua, e gausia foi le amo ona o le faauuina.”

O valoaga na o Iesu e faataunuuina. O lana faauuga e aveesea le mamafatū o agasala, maua ai le filemu ma le saolotoga, ma gausia le malosi o Satani. E lē toe iai se alofaga, a mea e malosi le tiapolo. O le toilalo, o le filifiliga a le tagata.

Fesili Iesu pe se ā le manatu o tagata ia te ia, poo ai? Fai mai nisi o Ioane le Papatiso, nisi o Elia, poo Ieremia, poo se tasi o perofeta. Toe fesili Iesu, a o le ā sa outou tali, o ai a’u? Tali Peteru, o oe o le Keriso. Fetalai Iesu, Amuia oe Simona Paiona, aua e le se tagata na faailoa atu ia te oe, a o lo’u Tamā i le lagi na faailoa atu. (Mataio 16:15-19) Lona uiga, na o se faaaliga (Revelation) mai le Tamā, e silafia ai Iesu.

O ia o le ogatotonugalēmu o lo tatou faatuatuaga. E teena e nisi Iesu, e lē se Atua. Aisea? E lē iloa le faaaliga o le Upu e uiga ia te ia. Ala lea o le soifua taumatemate faapea, masalo se perofeta.

Uiga o le igoa o Iesu, o le ‘faaola.’ A teena Iesu, ua teena le faaolataga.

O Iesu e faaolaina o tatou agaga. Fetalai Iesu, O a’u nei le ala, upu moni ma le ola. Ua tapu, e leai se isi auala e sao ai i le Tamā. Soia le faa’inaelo ia Iesu. Soia le upuvale i le Atua, soia le masalosalo. Soia le faatalatalanoa ma manatu faatauvaa, e lē se Atua. O le anitikeriso, o le agaga o le tiapolo ua fealualuai e tetee ia Keriso. E lē mafai na ta’u oe o se kerisiano, ae teena Iesu. O le kerisiano, o le ua faa-Kerisoina.

 

Uo Mosalemi

Talanoa ma se Mosalemi. Fai mai, faapefea na ta’u Iesu o le Atua malosi, ae sa fia’ai, fiainu, fiamoe, faanoanoa toe feoai ma tagata agasala. Faapefea na Pule aoao, ae sa fasiotia e tagata? Faapefea na taulagi o le Atua o le foafoaga, ae sa fanau pei se tagata? Fai mai a ia, nisi ia mafuaaga e teena ai Iesu, e lē se Atua. Lē talafeagai le Atua ma uiga faaalia i lona soifuaga.

Sa tali i ai, o le eseesega tonu lena o le talitonuga faa-Kerisiano ma outou. O outou, e tausaili lo outou atua, o matou, ua saili mai e le Atua. Outou e faamagalo agasala ia outou taulaga osi, o matou sa saunia e lo matou Atua le taulaga mo matou agasala. O outou e fasiotia mo outou atua, o matou, na maliu fasia le Atua mo matou. O outou, o loo feoti nei lava o outou atua, o matou, ua toetu ma o loo soifua nei lava lo matou Atua.

O le Atua o le Agaga, e lē mafai na oti, e lē vaaia foi e tagata.

Ae ina ua liutino tagata e ala ia Iesu, ua mafai ona vaaitino i lo tatou Atua. Molimau Ioane, sa matou vaavaai i ai, sa matou tagotago i ai, sa mau o ia faatasi ma i matou. O le Atua ua liutino tagata.

 

Paulo

O Paulo sa aoga ia Kamalielu, polofesa i mataupu tau Iutaia. Tupuaga; ituaiga o Peniamina, tautupu lona gafa. Manatua o le uluai tupu o Isaraelu, o le sa-Peniaminā. O le Eperu o sā Eperū. Faresaio. Sa maelega e fasioti tagata faatuatua ia Iesu.

Ae ina ua feiloai ma Iesu, ua tautino, o otaota mea uma. Suia le ma’ema’ea i le maelega i le Talalelei. Liusuavai le matāua ma le ilitata i mataupu tau Iesu.

Feliuaina le agaga fasioti tagata i le alofa. E lei mafai e le lotu Iutaia na suia Paulo, na o Iesu lava, ma ta’utino, ou te lē mā i le tala lelei ia Keriso; auā o le mana lea o le Atua e ola ai i latou uma e faatuatua e muamua le Iutaia, atoa ma le Eleni.

Leai se isi, na o Iesu le tali mo oe. O le tupu o tagata Iutaia. O le tupu amiotonu ma le tupu e faavavau. O le tupu o le lagi ma le lalolagi. O le tupu o tupu ma le Alii o Alii.

E lē mafai e gagana ona faamatala lona silisili ese. O lona alofa e leai se mea e gata mai ai. O le Alo o le Atua, o le faaola o le lalolagi. O le faaao o le foafoaga, e leai se isi la te tutusa.

O ia o le atoatoa o mea uma, na te faamalosia lē ua vaivai, ma faaola lē ua oti. Na te taofia i lona aao lana aufilifilia, ma faasinoala mo le ‘au faatuatua. Na te faamaloloina ē ua tiga, ma faamagalo agasala a ē ua salamō. Na te tatala noataga o lē ua saisaitia, ma faamalosi tulivae o lē ua vaivai. Na te totogi lau galuega fai i le faatuatua ma faamatagofie faaletonu o lou soifua.

O ia o le puna o le atamai, o le Alii o le Filemu. O lana Upu e faapaiaina tatou, ma lona natura e lē fesuisuiai.

O ia e malie ai o tatou loto, o lana amo foi e māmā. E lei mafai e le oti na taofi ia te ia i le tuugamau, o loo valaau nei lava ma le alofa, ai se fiainu, sau. Samoa, talia Iesu e avea ma faaola. Soifua.