Pulega Samoa Airways ma le aufaipisini a Samoa i le taimi o le fonotaga

E lē o gau le kammupani vaalele a le atunuu le Samoa Airways, o le pine o lea mau, e leai ma se sene a le Malo o faatoto mai i le tala faatatau o le tupe a le atunuu 2019-2020, o tuuina mai mo le Samoa Airways. O loo tagi lava i lima le faagaioiga o le kamupani vaalele, e leai se tupe o aumaia i le Malo, o le molimau ola lena e iloa ai o loo solosolo lelei le tautua a le Samoa Airways.

E lei alo foi le Ta’ita’ifono i lana saunoaga, afai ae malaga le 70% o tagata Samoa i le Samoa Airways, e oo atu i le isi 5 tausaga ua maua foi le 5 o tatou vaalele. O le taimi nei na o le 30% o tagata Samoa o loo faaaogaina le tautua a le Samoa Airways.

O saunoaga manino lea a le afioga i le ta’ita’ifono o le Samoa Airways le afioga ia Tuia Paepae Leota i se feiloaiga ma le mamalu o le atunuu i Aukilani i le vaiaso ua mavae. Na saunoa foi le afioga i le Taitifono, e leai se tulaga o tau maluelue ai fuafuaga a le kamupani vaalele a le atunuu. Pau le vaega na taufaaletonu ai nisi o fuafuaga a le kamupani ona o le vaega lea sa tulai mai i le vaalele lea sa fuafua e aumai le Boeing 737 Max 9, peitai, na toe taofia ona o faalavelave na pau’u ai vaalele o le ituaiga o le Boeing 737 Max 8.

Ae lei avea foi lea faaletonu ma mea sa nofoai ai le pulega o le kamupani vaalele o le atunuu, sa galulue lava i le ao ma le po i le vaiaso e tasi e tau fofo lea faafitauli e ui i le puupuu o le taimi, ae na mafai lava ona maua mai le vaalele mai le e faaauauina le tautua a le kamupani. E tasi le isi tulaga faigata na oo iai le auaunaga a le kamupani o le taugata ua oo iai nisi o kamupani vaalele a le lalolagi o loo lisiina mai ai vaalele ua alu atu lava i le 50% agai i luga i le 100% le tau ua sii ai le lisi o vaalele. Peitai la o le vaalele o loo faaaogaina nei e le atunuu i ana femalagaina e na o le 3 tausaga le matua o le vaa, o se vaa saogalemu ua mae’a foi ona pasia (certified) e Niu Sila ma Ausetalia.

Faailoa foi e le ta’ita’ifono ua silia i le 8 i le 10 alo ma tama fanau a Samoa sa galulue faa-pailate i isi atunuu ma maua o latou totogi tetele, ao lea ua mafai ona tafa so latou lagona e fia tautua i le kamupani vaalele a le tatou lava atunuu.  

O le mea lea e momoli ai le agaga faafetai i tama fanau o le atunuu ona o le loto nuu ma le loto fia tautua ia Samoa aemaise o le atinaeina o auaunaga a kamupani lava a Samoa. Tusa ai ma aiaiga ma le saogalemu lelei o femalagaina o vaalele, e tatau ona sefulufa ni pailate e galulue i le vaalele e tasi ina ia lava malologa a pailate aua le faatautaia o femalagaina o vaalele i le va o atunuu eseese.

O le fuafuaga o loo iai a le kamupani vaalele a Samoa e tatau ona oo atu ia Aukuso poo Setema ua aumai le vaalele fou a le Samoa Airways, o loo taumafai pea e faatalanoa se vave e mafai ona oo mai ai lo tatou vaalele. O le vaalele lenei o le a resitalaina lava i lalo o le igoa o Samoa.

E tele nisi o atugaluga o lagona o le atunuu e uiga i le auaunaga a le kamupani vaalele a Samoa na fofogaina i le feiloaga ma le Ta’ita’ifono, peitai, o le autu lea o le malaga mai a le Tiataifono, e lē gata ina ia faaoloolomaau mai i le lagolago a le atunuu, ae e fia faafofoga foi ini fautuaga a le atunuu, ini auala e faaleleia atili ai le tautua a le Samoa Airways.

Ua tali leleia foi e le mamalu o le atunuu le savali a le Ta’ita’ifono ma ua faamalieina foi o latou loto i nisi o atugaluga sa nonofo ma latou e uiga i le vaalele a le atunuu. Aemaise ai o le loto fiafia o le ta’ita’ifono ia Tuia Paepae i le tali atu o Samoa i Aukilani ua le gata i susuga i faafeagaiga ma ekalesia ae faapea foi i tupu ma ee o le atunuu ma kamupani a tama fanau o Samoa i le talisapaia o lana savali auā se manuia o le kamupani vaalele a le atunuu le Samoa Air Ways. Tele foi nisi o faafesili a le atunuu na mafai ona fesoasoani iai le susuga i le alii pule o le Samoa Airways i Aukilani le tofa ia Mailo Senara e tali mai aua lava le silafia.

O le afioga ia Tuia Paepae Leota, ua 14 tausaga o avea ma sui o le Komiti Faatonu o le kamupani vaalele a le atunuu, amata mai i taimi o le Polenisia se’ia oo mai i le taimi nei. Na tofia faafuasei o ia i le lua masina talu ai e le Malo e avea ma Ta’ita’ifono o le Samoa Airways ina ua faamavae le afioga ia Feesago Fepuleai, sa nofoia le nofoa o le Ta’ita’ifono.

Saunoa le Tuia, o le a foi ma le fiafia i Samoa ua tele oso o lana malaga ua maua. E tele foi suiga o le a silasila iai le kamupani e faia, ina ia faamalieina manaoga o le atunuu e pei ona folasia i feiloaiga e lua na faia. O le feiloaiga ma faifeau faapea le mamalu lautele o le atunuu, ma le feiloaiga na faia le aufaipisinisi Samoa i Aukilani.