Ua molimauina le tele o mataupu e aafia ai le solitulafono o le gaoi a o avea ma tagata faigaluega ua faia i ai faaiuga a le Faamasinoga Maualuga i Samoa, e pei ona faasalaina ai i le falepuipui se alii sa galue i le faletupe o le ANZ ma se tamaitai sa galue i le faletupe o le Samoa National Bank.
O le alii o Maselusi sa galue o se taitai poo se supervisor o le vaega e faia feuiuiaiga tau tupe poo transfer mo teugatupe poo accounts a tagata o loo fai paaga ma lea faletupe.
O le teugatupe a lona tuafafine i le ANZ na ia faaaogā e transfer i ai ni seleni lea sa ia faaaogā ai le ATM Card a lona tuafafine e toe tala ai ia seleni e pei ona toesea ai se vaegatupe e tusa ma le $75,922 tala.
O le masina o Me e oo i le masina o Novema o le tausaga e 2007 na aliali ai lea faiga lē manuia ma gaoia ai lea seleni tele.
Sa fesiligia Maselusi e le faletupe ina ua maua le faaletonu ae sa ia faafiti, peitai ina ua aumai tagata suesue i fafo e popoto i fesootaiga tau komepiuta na iloa ai o lē ua molia na ia faia ma faapea ai loa ona ioe i moliaga a leoleo e 65.
E tolu tausaga ua asiasi ai i Tafaigata lea taulealea ua 31 tausaga o lona matua.
O le tamaitai o Cleopatra sa galue i le National Bank o se tasi e taulimaina le totogi o nonogatupe a tagata, ona ia faalisiti lea ae tuu i totonu o faamaumauga o komepiuta seleni ua totogi o ia nonogatupe.
Peitai e iai se vaitaimi na ia lē tāina ai seleni nei ae ua ia faaaogā lea na molia ai le toesea o se tinoitpe e silia ma le $9,913 tala. E 18 masina ua nofosala ai i le falepuipui.
O lea tamaitai e fai lona toalua ma lana fanau ma o le faavae lea o se talosaga a lana loia mo se sala mama peitai na saunoa Vui Clarence Nelson e matuiā tele le solitulafono, aemaise o loo faamamafa i le tulafono le aafia o le faatuatuaga o le tagata e ana ni meatotino i se gaoiga faapea.
O le masina na tea nei na lauina ai foi nisi faaiuga mo nisi o tagata faigaluega sa galulue i kamupani ma pisinisi ma faasalaina foi i le falepuipui ona o le limatagovale i meatotino e aofia ai tupe ma oloa.
