Ose tasi lenei o faaupuga e tele ina faalupelupe ai e le atunuu le alii Palemia pe a oo ini sauniga faalemalo poo soo se tuufaatasiga lava e lauga faapitoa ai le ta’ita’i ole atunuu, e lē gata ole Afioga ile Alii Palemia, ae ole Tamā foi ole Atunuu.
Ma ose faaupuga na matuā samala e le Afioga ile Alii Palemia, Tuilaepa Sailele Malielegaoi ile faatalanoaga ma le Talanoa Samoa ile vaiaso na tea nei. Ta’ua e Tuilaepa, ole faaupuga lenei oloo tele ina faasee ai o ia. O ia ole tamā ole atunuu, fai mai Tuilaepa, faamolemole e tofu uma lava tatou ma tamā, “e lē o A’u ose tou tamā”.
Na mafua ona saunoa le afioga ile Alii Palemia i lea vaega ona ole toatele ole mamalu ole atunuu e autovaa atu i lona ofisa i aso uma e saili se fesoasoani ise seleni e totogi ai pili o fanau aoga, e oo lava ile vaitau ole faamati ua agai atu lava le mamalu ole atunuu e saili se fesoasoani ile ofisa ole Afioga ile Alii Palemia, ma ua faaaogāina ai e le toatele le faaupuga lava lea e tasi e saili fesoasoani ai ile Palemia auā o ia ole Tamā ole Atunuu.
E moni lava na saunoa le Alii Palemia e tofu lava le tagata ma lona tamā peitai e lē ose faaupuga na faia i luga o sona ita poo se teena ose tasi e sulu atu ise fesoasoani. E iai le malamalamaaga ale tatou nusipepa e toatele i latou na saili fesoasoani atu ile ta’ita’i ole atunuu ile tele o mataupu e manaomia ai le fesoasoani, ma e talisapaia lava e le Afioga ile Alii Palemia. Ole mau masani lava ale toatele ole atunuu e fia maua se fesoasoani, e sili atu ma faigofie ona maua le avanoa e talanoa ai ile Alii Palemia nai lo se avanoa e talanoa ai ise Ofisa Sili ose Matagaluega ale Malo poo se Minisita foi.
Ole talanoaga foi lenei na fautuaina ai e le Alii Palemia ile tatau lea ona suia le taimi e faataunuuina ai asiasiga mo faamati a Ekalesia i totonu ole atunuu. Fai mai Tuilaepa, ana faapea o ia e pule i faamati semanu ua lē toe faia ile masina o Mati ona ole masina lea e gafa ai mātua ma le sailiga o pili aoga ale fanau, ae ia faataunuuina ile masina o Tesema, ona faaigoa ai lea ia faatesema, ona tasi a lea ole meaalofa e ave ile faifeau ile taimi e tasi, ole meaalofa ole faatesema toe meaalofa foi lena mo le kirisimasi. E lē o iai se agaga ole ta’ita’i ole atunuu ina ia faamuta vaega nei i totonu o Ekalesia ona o lona taofi e tatau ona faaauau pea faamati nei auā oloo atia’e ai le galuega a Ekalesia, ae fautuaina le suia ole taimi e tatau ona faatino ai.
Ole vaega mulimuli na ta’ua e le Afioga ile Alii Palemia i lea faatalanoaga, o lona popolega lea ile faasalalau mai ai o avanoa faigaluega mo leoleo i totonu o Niu Sila. E pei ona silafia ole Afioga ile Alii Palemia oloo avea foi ma Minisita ole Matagaluega o Leoleo ile taimi nei. Saunoa le ta’ita’i ole atunuu, e matuā popole lava i nei avanoa i mea ane ua iloa uma e le toatele o leoleo Samoa ona talosaga ai lea mo Niu Sila ae faaletonu ai galuega a leoleo i Samoa nei.
Ole vaai ale tagata e toatasi, ia manuia lana fanau ma lona aiga, ole mafuaaga lena e talosaga ai i avanoa faapenei i atunuu e mamao peitai ole vaai ale malo e mamao ile lumanai ole atunuu, saunoaga lea ale Alii Palemia, ma e leai foi se malosiaga ole Malo e taofiofi ai leoleo Samoa pe afai ae tusi talosaga i nei avanoa ona ole eseesega lava o totogi ma faamanuiaga mo aiga. E na’o le pau vaega oloo tele ina malaga agai ai leoleo Samoa, o avanoa mo galuega e fesoasoani ai leoleo i nisi atunuu ole lalolagi i lalo o polokalame fai paaga ma Malo Aufaatasi (UN).
