O se taaloga lava o le a manatua pea ma faagalo gata e tagata lenei taaloga faitaulia muamua, o le a alo atu nei i ai le Toa Samoa ma le Siamupi o le Lalolagi i le Liki, le Kiwi.
O le Aso Toonai, 16 o Okeopa lea o le a iloilo ai nei ‘au e lua mo le uluai taimi. E lē taumate o le a tulimatai e le lalolagi ma le toatele e fiafia i lea taaloga, ona o le au malosi a le Toa Samoa lea ua mae‘a ona faailoa mai, e lē gata mo lea taaloga, ae mo le taaloga e sosoo ai ma Tonga lea e faia i Sini Ausetalia i le aso 24 o Oketopa lava.
E to‘a 30 alii taaalo Samoa mai Kalapu eseese e i le Taamilosaga Super Liki a Peretania, a o le Taamilosaga foi a le NRL a Ausetalia, lea ua mae‘a ona sii o latou aao e avanoa mo Samoa i ia taaloga e lua, aemaise lava le taaloga ma le Kiwi i le aso 16.
O le Faiaoga fou mo le Toa Samoa o le alii o Steve Price, o lē sa avaea ma Faiaoga Lagolago a le Kalapu a St George a Ausetalia le Dragons, lea foi ua ia faailoa lona fiafia tele i le ‘au a le Toa Samoa lea ua filifilia, aemaise o le avanoa lelei lenei e faalauiloa ai i le Lalolagi, e mafai foi e Samoa ona feagai ma ‘au tetele, ma avea pea ma avanoa o faamanuiaga mo le taaloga Liki i le lumanai.
O suafa la nei o le to‘a 30 ua faailoa mai mo le au, ae faatoa faamautinoa lelei mai pe a mae‘a le sailiga Siamupini a le NRL i le aso 3 o Oketopa. E ese mai le to‘a 30, o lea foi faato‘ā maua mai se isi faamatalaga mai le iuni i Samoa, ua iai alo e toaono (6) ua tofia mai lava i ‘au i Samoa, o le a faaopoopo atu i le lisi lenei a le Toa Samoa.
