E le ni solovae tina Samoa…

O lagona nei na faaalia e le Afioga Auelua Apoiliu Warren i le tali atu ai i le pulenuu o le afioaga o Lepea ina ua finauina le tofiga o tina i tulaga faigaluega.
O finauga na mafua ona o le talanoaina o le Feagaiga e soloia ai soo se ituaiga faailoga tagata faasaga i tamaitai.
I lea faatalatalanoaga na laga ina ua tatala aloaia e le Ofisa Sili o le Matagaluega o Tina & Tamaitai, Atinae o Nuu ma Afioaga ma Agafesootai, o Luagalau Foisagaasina Eteuati Shon, ma ia taua ai, e ui ua maualuga le tulaga o iai le taumafai o tamaitai o Samoa i tofiga o galuega, e pei ona iai nisi ua avea ma Minisita o le Kapeneta ae ai lava se manaia ae ausia e se tamaitai le tofi Palemia.
O le tofi aupito maualuga i galuega a le Malo ma o se tofiga e taulai i ai le atinae aoaoina ma le tautua o soo se tasi.
O se saunoaga na toe laga e le Pulenuu o le afioaga o Lepea lea na ia taua ai, e le talafeagai ia lafoga ona e foliga mai ua taumafai tamaitai e ausia se tofiga e le tatau ona oo i ai.
Faaalia e lea tama, o tamaitai e onomea lava i le faalogologo ma taofi mau manatu faaalia pe a oo i tofiga maualuluga nei, ae le tatau ona lagalaga mai ia manatu ona o lona finagalo ua le talafeagai tele.
O se lafoga na tulai ai loa le afioga Auelua, o se tamaitai o loo avea nei o se Ofisa Sili Lagolago a le Matagaluega o Tupe Maua (Inland Revenue) ma muai faatoese lava i le atunuu na auai i lea fonotaga ma ia faamalulu i le mamalu o le au usufono talu ai o lona manatu, o lafoga a le alii Pulenuu, ua le talafeagai.
Faaalia e Auelua Apoiliu, e le o ni solovae tamaitai o Samoa ma o ituaiga lafoga nei ua mafua ai lava le manaoga ina ia iai ni tulafono e taofia ai uiga faailoga tagata e pei ona iai nei le CEDAW.
Faaalia e Auelua Apoiliu, o lagona nei ua tutusa lava ma le faailoga tagata lea ua tuu eseese ai tamaitai o nofotane, ae e tatau ona iai le manatu i tagata uma o le nofotane poo le faiava o se aiga, o lou uso, o lau tama ma o lou tuafafine poo lou tuagane, ae le o se tagata ese e pei ona iai le mafaufauga i le tele o le atunuu.
O se lagona o le afioga Auelua Apoiliu e tatau ona amanaia le tautua a tamaitai mai i aiga, i nuu, ekalesia aemaise o totonu o a latou galuega ma e manaia foi ae tulai mai i se taimi lata mai se tamaitai e taitai le malo i le tofi Palemia.
O le taimi lenei e toatolu tamaitai o loo umia tofi Minisita o le Kapeneta, le Afioga Safuneituuga Paaga Neri i le Matagaluega o Fesootaiga, Faamatalaga ma Fesootaiga Vavave Faaneionapo ma le Faalapotopotoga o Faasalalauga, le Afioga Fiame Naomi Mataafa o le Minisita o le Matagaluega o Tina & Tamaitai, Atinae o Nuu ma Afioaga ma Agafesootai, ma le Afioga Gatoloaifaana Amataga Alesana Gidlow, le Minisita o le Soifua Maloloina.
E toatasi le faipule tamaitai o loo tulai mai o se faipule tutoatasi, le Afioga Fuimaono Te‘i. 
Ua manino le toatele o tamaitai i tofi Ofisa Sili ma Ofisa Sili Lagolago o Matagaluega ma Faalapotopotoga a le Malo, aemaise tamaitai ua tulai mai i le taitaiga o Faalapotopotoga Tumaoti aemaise pisinisi tumaoti i totonu o le atunuu ae o tofiga lava faaupufai o Malo lea o loo unaia ai le numera o tina ma tamaitai.
O le faamoemoe o ia feutagaiga i le CEDAW, ua valaaulia le atunuu e faaali i ai o latou finagalo i vaega e toe teuteu ai lea feagaiga.
O se galuega e fai faatasi ina ia mafai ai ona unai tulafono e faamalosia ai le puipuiga o tamaitai.
Ua tele faitioga i atumotu o le Pasefika mai i Malo Aufaatasi ona e le o maoti tulafono lava ia e faatatau i sauaga, ma e na o Vanuatu lava o loo maoti i le taimi nei ana tulafono e faatatau i puipuiga o tamaitai ma fanau. O isi atunuu o le Pasefika ua aofai faatasi lava puipuiga o tina ma fanau i tulafono masani e pei o le faaoolima seia oo lava i le fasioti tagata.
O le leaga o lea itu e pei ona taua e Kuiniselani Tago, o le Ofisa Sili Lagolago o le Matagaluega o Tina & Tamaitai, Atinae o Nuu ma Afioaga ma Agafesootai, o loo nafa tonu ma le faamalamalamaga o lenei Feagaiga, ona e tele ituaiga sauaga e tatau lava ona maoti faasalaga e faia i ai, ma o le manaoga ina ia maioio uma soligatulafono nei ae le o le tuufaatasi uma o nei sauaga.