O faamaumauga a le faamasinoga i solitulafono ua molia ai ni tagata i lalo o le tulafono o femalagaa’iga, e na’o Talalelei Pauga, ua molia atu i le faia o se ta’utinoga pepelo poo se tautinoga lē moni, o le leai o ni ana solitulafono ua faamaonia i luma o le faamasinoga. Peitai na fesiligia le Pule Sili o le Matagaluega a le Palemia ma le Kapeneta o loo iai ma le ofisa o femalagaa’iga le tofa Agafili Shem Leo, pe sa’o ae sa ia teena. Na faailoa e Agafili e toatele isi tagata ua molia foi i le lē sa’o o le faatumuina o le pepa mo tagata malaga e afea Samoa. “E maualalo tele lena faamatalaga, ua iai foi isi tagata ua molia ai”.
O Talelei Pauga na ioe i lona faia o le ta’utinoga lē moni ma faasala ai e le faamasinoga faaitumalo i se sala tupe. O lea taulealea e faamautu i Ausetalia ae sa molia ai e leoleo i lona faia o se gaioiga na lepeti ai le filemu e ala i se gaioiga na ia ulufale ai i se nofoaga sa faia ai se sauniga e sami ai le malaga muamua a le Samoa Airways i Perisipeni i Ausetalia, ma ia togi atu ai se ulupuaa a’o saunoa ai le Palemia o Samoa.
O lea solitulafono na faasala ai e le faamasinoga i Ausetalia i se sala tupe. Na fesiligia Agafili pe o le mafuaaga lea na tulituli’aupu ai e le vaega o femalagaa’iga lea taulealea ma siaki lana pepa faatumu ma molia ai i le faia o se ta’utinoga pepelo. Na tali Agafili e lē o se mafuaaga lea o le moliaga ona e lē na’o Talalelei le tagata ua molia i le lē sa’o o faamatalaga e faatumuina ai lea pepa.
Ua faamanino mai e le Pule Sili o lea pepa faatumu e lē gata e manaomia ai faamatalaga uma faasino i le soifua maloloina o se tagata malaga e afea le atunuu, ae o faamatalaga foi i ni oloa na te tauaveina ina ia malupuipuia tuaoi o Samoa mai ni faama’i aemaise o ni faiga tau solitulofono e lamatia ai le saogalemu o le atunuu. Na afea i le finagalo o le Pule Sili le faalavelave i Kalaiesetete i Niu Sila ma lana saunoaga o le tāua lea o le maua o faamatalaga moni o se tagata malaga mo le malu o tuaoi o le atunuu mai ni gaioiga solitulafono.
E manatua pea nisi o tagata malaga e lē faailoaina ia latou pepa faatumu faamatalaga moni o a latou faamomoli e ave i Niu Sila ma Ausetalia, auā e tatala atu loa le suavai o loo iai ni lu’au e filo ai ni aano o moa poo siusiu-pipi e tasi lava le faaiuga a le aupapalagi o le togi i le lapisi. O nisi foi tagata malaga ua faasala tupe pe a maua ai ni oloa e lē faatagaina ae e lē o faailoaina ia latou pepa faatumu.
