E lē mavae uiga tausaafia o se Tina alofa

E iai le talitonuga o le isi fatu pese, o le maliu ma le oti e leai sona taunuuga, peitai ua na o se moe, e pei ona lauvivilu ai le Au Kerisiano.
E toatele fafine e amio lelei i latou, a o oe, ua faasilisili oe ia i latou uma. (Faataoto 31:29) O toe saafiafiga ia na momoo i ai Puletini ma le nofoaalo faapea aiga uma o le tina ia Alofagia I‘uomalo Faafeū i toe taimi faaiu o le mafutaga faaleaiga ina ua motusia faafuasei.

E iai nisi o lagona e fetautaua‘i faa‘auvaa lelea ma fenumiai faatai o palolo mafaufauga ona o le faagalogata o se tagata i ona uiga tausaafia, peitai o aga lava o le olaga, o aso e ‘ata ai, ma aso foi e tagi ai. Talu ai o le nofoaalo uma ua aumau i Brisbane, o lea na malaga mai ai le tamā ia Puletini ma le tinā ia Alofagia e tali le manaoga o le nofoaalo, e faamanatu le 50 tausaga o le soifua o le tina, ma o inā na muta ai le mafutaga mafana ina ua valaau le Matai “Alofagia, ulufale maia i le fiafia o lou Alii”.

O le tina ia Alofagia I‘uomalo Limala‘u Faafeū na soifua a‘e i lona alalafaga o Ulutogia Aleipata i le aso 23 o Mati 1961. Na faaipoipo atu o ia i si ana manamea le susuga ia Puletini Tauā Faafeū (Lalomanu) ma e to‘a 9 le nofoaalo (Sarona, Piniki, Kaiva, Toa, Tofiga, Tolupene-(maliu), Onofitu, Peter &Violeta).

Ua leva ona gasegase le tina peitai o se tina e tauivi pea ma le onosai toe faamauina le tele o lona faatuatua e pei ona molimauina i molimau le tele o ana galuega lelei i totonu o lona aiga, ma o le ala lea ua faaaigalua ai i Samoa ma Ausetalia nei.

O le aso 18 o Iuni na faamānavaina ai galuega a le tina, ae o le po o le Aso Faraile aso 25 o Iuni na faia ai ona sauniga faaleaiga i le Malumalu o le Ekalesia Katoliko i Acacia Ridge. Na taitaia le sauniga e le susuga ia Ps Tausinioga Tauti (faafeagaiga AOG Samoa i Carole Park).

O talosaga sa molimolia e le susuga i le Toeaina ia Ps Lega Ropati Frost, ma le upu faalaeiau sa tapenaina e lana auauna, Ps Toluono o le Ekalesia AOG. E tele i latou na molimau i le soifua galue ma le tauivi o le tina ua manuia ai le nofoaalo ma aumau i nei atunuu. Saunoa foi Puletini o se mafutaga e pei ona silafia sa manatu maualuga lava e lē o se taimi lenei e muta ai le mafutaga mafana, peitai e pule lava le Atua poto.

O le taeao o le Aso Toonai na faia ai ona sauniga faaiu i le Malumalu EFKS Brisbane (Rev Milo & Talamasinei Faaleava). Na taitaia e le susuga ia Ps Toluono, ae saunoa Ps Tausinioga Tauti i se upu faamafanafana mo le aiga, ona alo lea o le susuga i le toeaina ia Ps Lega Ropati Frost e faaiu ona sauniga i le fanua maliu i Wacol.

Na mae‘a ona see atu lea i le nofoaga i Dara auā le taliga o le sua, ma o le tofa ia I‘uomalo Sapati Fuimaono (tuagane o Itagaia) sa tu i le tootoo auā faaaloaloga masani, ae o le fofoga o le aso na faatautaia lea e le tofa ia Satama Safua Tavale.

Na fai ma sui o le auvalaaulia ma le Ekalesia le susuga ia Talosaga Auvaniti (A‘oa‘o o le tala lelei mai le Ekalesia AOG Samoa i Carole Park) e faafetaia aiga na lua i le maualuluga o faaaloaloga auā le aufaigaluega a le Atua ma Samoa na potopoto. O le fofoga taumafa sa saunia lava e aiga na lua faatasi ma le lagolagosua a le susuga ia Tui Vaimoso o le Paradise Roast.

Faamaise atu le agaga o le Atua i le tamā ia Puletini faapea le nofoaalo ma aiga na lua ona o le motusia o le mafutaga mafana ma le tina ia Alofagia.