“Taofi suiga o le itu auala ae faatali i le faamasinoga”… Toleafoa Solomona
“E le suia le iuga a le Malo”… Tuilaepa Sailele
“Ua uma ona fai tapenaga e puipuia ai tagata mai ni faalavelave e tutupu mai, ae le mafai ona taofia le faalavelave a le tagata ia e alu lava ia e fai”… o se finagalo o le alii Palemia ina ua fesiligia e le tusitala i sona finagalo e tusa o se fanoga o le alii loia o loo finauina le taofi o le faatinoina o le suiga o le itu auala, le susuga Toleafoa Solomona Toailoa ua ia toe valuvalusia ai aa o le laau pe le ua tatau ona taofi le amata faatinoina o lea fuafuaga, ae faatali sei aumai se faaiuga a le faamasinoga i le tagi faasaga i lea fuafuaga.
“Ua tatau i le alii Palemia ona taofi le suiga, aua afai na te faatino sea tulaga o le a iloa ai lona faaaloalo tele i le faamasinoga”… na saunoa ai Toleafoa Solomona Toailoa. Ae na faaalia e Tuilaepa ua atili malo tiaa le mataupu ina ua sao atu nei le tagi i le faamasinoga aua o le a liliu foi le Malo e toe faia ni teuteuga i le tulafono ua pasia, e tapunipuni ai ni taumafaiga ma togafiti e lepeti ai le fuafuaga a le Malo. “E leai se alu i tua i fuafuaga a le Malo, na o le alu lava i luma”… saunoa ai le palemia.
O le finagalo o le alii loia sa avea ma uluai taitaifono o le PASS lea na alu le latou solo tetee i le Palemene ina ua faailoa e le alii Palemia se tulafono o le a faatino ai le suiga, na mafua ona o le faaiuga a le faamasinoga ua teena ai le finau atu a le Loia Sili e faaleaoga le tagi a le au tetee.
Na saunoa Toleafoa e talitonuina lava e oo le mataupu i le faamasinoga o talosaga le Court of Appeal, pe afai e aumai se iuga e manumalo le Malo pe manumalo le PASS, o lona uiga e saga faaumiumi ai pea le mataupu. O tapenaga a le Malo na faaalia e le alii Palemia ua pasia ai nisi o tulafono e fesootai ma le suiga o le itu o le alatele o le a feoai ai taavale. E pei o le tulafono o le a amata faaaoga ai e leoleo masini o breathalysers e sue ai avetaavale o loo tagofia le avamalosi. Na soisoi le alii palemia ma ia faaalia i se talanoaga ma le tusitala, o togafiti uma nei na fanau mai Mose ua leva ona iai.
Sa taua e se tasi o sui o le PASS o ia lea o le Peresitene o le faamalu o faalapotopotoga tumaoti le SUNGO (Samoa Umbrella for Non Govermental Organisations) susuga Vaasilifiti Moelagi Jackson, o se tasi o loo ave lona suafa i le tagi e taofia le faia o se suiga fou i feoaiga i luga o alatetele, e iai lona manatu o le liliu o le Malo e faatino le suiga fou ona e toatele tagata o Samoa o alaala ma aumau i Niu Sila ma Ausetalia o loo unaia le palemia e faia ma faataunuu le fuafuaga. Peitai na fesili Tuilaepa poo ai tagata i fafo o loo faatatau i ai lea lafoga a Vaasilifiti Moelagi, o loo latou unaia le Malo. “E oo foi i lena loomatua, ae talofa la i se tulaga o iai le SUNGO pe afai o ni manatu na o le latou taitai, o ai ni tagata valea i fafo o unai maia. A o manatu o tagata le aoaoina ma le malamalama i mea la e talanoa i ai latou te faia ni faamatalaga faavasivasi faapena. Afai o iai foi lena tamaitai ae faapena faamatalaga, talofa i le SUNGO”…na saunoa ai le Palemia.
E $30,000 afe se tinoitupe o loo manaomia e le komiti o le PASS e faatino ai a latou tapenaga mo le faamasinoga, ma o le a faatupe ai ma pasese o ni tagata popoto faapitoa i feoaiga i luga o alatetele mai fafo o le a malaga i Samoa mo le faia oni a latou molimau e lagolago ai le tagi. O se taimi o i luma o le a faailoa ai se teugatupe o le a tuuina i ai ni seleni o le a alolofa atu ai le atunuu.
