Ua faamatala nei e le taitai o le HRPP le afioga i le Palemia, Susuga Tuilaepa Lupesoliai Sailele Malielegaoi, o lana saunoaga i le Palemene i le sui o faipule e faamavae atu ma le vaega faaupufai, ua na o ni upu aitalafu.
Na soisoi le alii Palemia ina ua fesiligia i le fono a le faafaletui o le HRPP na talanoa ai le lumanai o le faipule o Siumu le tofa Tuuu Anasii Leota, ma le susuga Papalii Niko Lee Hang, o ni faipule sa faatau matatao pea i totonu o le lotoifale o le pati ma aliali ai nisi o faaluafesasi i le maopoopoga o faipule o le faafaletui.
Faaalia e Tuilaepa o faipule o lana vaega e fai gapia uma, ma e lē o iai se faaletonu. Na ia faailoa foi o le taimi lenei e faalele ai loketi a faipule ona ua lata le palota tele a le atunuu, ma o se finagalo o le taitai na toe soisoi ai foi.
“Ia se leai o matou upu aitalafu, ua e iloa foi matou i le HRPP e fai gapia uma. Ua e iloa foi o le taimi lenei ua lalata le vai vaa, o le taimi lenei e lē toe tafanaina ni ‘aū ae ua fana loketi, hahahahahaha.”
Peitai o le saunoaga a le Palemia i le Palemene na ia lu‘iina ai le faipule o Siumu e faamavae, na faailoa ai e le tofa Tuuu ina ua fesiligia e le tusitala, e lē faamavae. O lana mau o loo lelei le HRPP ae e iai vaega o le taitaiga o le HRPP a le afioga i le Palemia e lē o fiafia i ai.
E lei faailoaina e Tuuu poo ā vaega e lē o fiafia i ai. O le fono a le faafaletui a le HRPP i le vaiaso ua mavae, na faailoa mai ai e se molimau faatuatuaina, sa lugā lālō finagalo faaalia o sui faipule ae na taualuga i le toe fefaamagaloai.
“Ua uma foi sia mea na o le fusifusi lava ma feasogi, ma o faiga lava ia o mea nei o polokiki”.
Na fai le fiafia a le HRPP i lo latou nofoaga tutotonu i le afiafi o le Aso Tofi ua mavae ina ua mae‘a le latou fonotaga faafaletui. Mo le silafia e lē o se taimi muamua lenei ua aliali ai ni feteenaiga i totonu o lea vaega faaupufai.
O le taimi na aliali ai faaletonu i le lipoti a le pule ma suetusi sili lea na laumanuia ai le suafa o se tasi o minisita o le kapeneta i ni faaiuga lē talafeagai i le faatinoga o ona tiute, na sainia ai se tusi e ni faipule se to‘a 20 o le HRPP ma ave i lo latou taitai ma fautuaina ai le faia o sana faaiuga e faasee ese ai lea faipule ma le tofi minisita o Tupe. Na taualuga lea feteenaiga i le saunoa o lea minsiita i le Kapeneta le afioga Faumuina Tiatia Liuga, ma folasia ai lana faamavaega.
E lei muta ai le mimilo pea o lagona o nisi o faipule sa i le komiti o ofisa o le Palemene na latou toe suesueina le lipoti a le Suetusi sili. Na latou fautuaina le Malo e faia ni suesuega tau solitulafono faasaga ia i latou na tuua‘ia i le lipoti a le Suetusi sili e ofia ai ma le faipule sa avea ma minisita o Tupe.
O le tali a le Malo ua aumai ua teena ai lea fautuaga ma ua talia e le Palemene le tali a le Malo, e ui e lē o talia e sui uma o le komiti o ofisa o le Palemene lea e taitaifono ai le tasi o sui faipule o le HRPP le afioga Muagututagata Peter Ah Him, ae o loo iai ma isi sui o le HRPP i le komiti lea e pei o le susuga Papalii Niko Lee Hang.
Ua faailoa e Tuuu Anasii i se tasi o lipoti suafa o nisi o faipule o loo lagolagoina ona manatu faatautee e pei o le Sui palemia ma le Minisita o Faamasinoga.
