E pei ona auina atu i nisi o tatou ripoti muamua tapenaga o loo tapena mamao i ai le ‘au a le Manusina i nisi o taaloga faitaulia ina ia saofaga atu ai le Manusina i faalagamaea Faavaomalo i le taaloga o le Lakapi i le Ipu o le lalolagi i le tausaga fou i le itupa o tamaitai.
O loo vaaia pe le faaauauina o sailiiliga mamao aemaise le malosi faaletagata soifua ina ia atoatoa lona tulai e faatinoina ai le taaloga.
Mai lava ina ua filifilia le Faiaoga faatasi ai ma le pulega, o loo vaaa ai pea le lotonuu, loto atunuu saili malo ina ia siitia le tulaga o Samoa i lenei taaloga aemaise ai lava le lakapi i le itupa o tamaitai. E molimauina e le tusitala se vaaaiga mataina i tapenapenaga ua iai nei.
I le afiafi o le Aso Gafua na se‘i mavae atu, sa faataunuu ai foi toleniga masani ma maua ai loa ma le avanoa e feiloai atu ai le Manusina i le Amepasa o le malo tele o Amerika i Niu Sila i lea lava afiafi.
Tusa ai ma se feiloaiga a le tusitala ma le taitaimalaga ia Serah Mika, na ia faapea ai o le auga autū lava ina ia avea lea afiafi ma avanoa e faalogologo ai le Manusina i ni saunoaga luitau faapea ni faamalosiau i le Manusina a o feagai pea ma tapenapenaga mo Sepaia.
I le saunoaga la a le Amepasa na ia toe faamanatu ai i le Manusina le tāua o lona iai i ia taaloaga aemaise foi le tamaitai na mua i malae ma manumalo faalua i le Ipu o le Lalolagi, mulia‘i le faagatama a alii, ae o tamaitai lava na muai faaeaina ai Niu Sila.
Sa ia saunoa foi i le tāua o le polokalame lelei i aso ma taimi a le tagata lava ia , faapea foi le uumi o faigamalaga mai lea atunuu i lea atunuu mo le tausia o le malosi tapena ai mo taaloga ina ia lava saunia lelei.
E lē gata i lea, o le alii Amepasa o se tagata e fiafia tele i soo se taaloga i totonu o Amerika, ma na saunoa foi le Amepasa e faafetai le Malo o Samoa i le tulaga lagolago o loo iai i fuafuaga faatasi ai ma le tapuaiga o faiva o tamaitai. O le masina la lenei o Aperila o le a faataunuuina ai lea faamoemoe ma le talitonuga e faaeaina le taumafai a alo ma fanau.
Na matuai faafiafiaina le ‘au a tamaitai ina ua mae‘a le saunoaga faamalosiau mo sui uma o le Manusina. O loo manuia le tapenaga a le Manusina auā le alo atu i taaloga i Sepania i le masina lenei o Aperila.
