O le fonotaga i le Aso Toonai i ona tua atu, na atagia ai le toatele o nisi e le o malamalama i ala o le tulafono o femalagaaiga i Niu Sila.
Na o le Matagaluega o Femalagaaiga a Niu Sila e nafa ma le faia o visa ma pemita e mafai ai ona nofomau se isi i Niu Sila. E leai lava se isi matagaluega, poo se isi ofisa o loo iai lea malosiaga na o le Malo Niu Sila.
O le tulafono o femalagaaiga o loo faataoto lelei ai aiaiga e mafai ona faavae ai sau talosaga mo visa ma pemita pe afai o loo iai sau fuafuaga mo Niu Sila. O lea tulafono o loo aiaia ai faatonuga i mea e tatau ona e faia pe afai e te fia malaga mo se tafaoga, poo lou fia aoga, poo le faigaluega, faapea ma le nofomau. E faapitoa lava le visa ma le pemita e tatau ona e talosagaina mo ia vaega eseese.
I le vaega o le nofomau, e iai foi aiaiga faapitoa e pulea ai talosaga mo le nofomau i Niu Sila, ma e ao ia te oe ona e sailiili lelei ma fesiligia le Ofisa o Femalagaaiga ae lei faataunuuina au fuafuaga poo sau talosaga. E toatele nisi o loo fia nonofo mau pea i Niu Sila ae le o malamalama poo le a le mea e fai.
O nisi ua faapea mai, ua tele naua latou tupe na totogi i loia ma consultants, ae leai lava se fesoasoani na maua mai. Ona fesili lea i ai o le Ofisa o Femalagaaiga pe o iai ni lisiti e faamaonia ai lea faamatalaga ae tali mai e leai. Ua le talitonuina la e le Ofisa o Femalagaaiga ma ua teena ai lea talosaga.
O le isi ua suesue atu e le Ofisa o Femalagaaiga, ua ese le suafa o loo tusia i le talosaga, ese le faaiu o loo faaaoga i le tusifolau, ese foi le isi suafa o loo pipii i le pepa fanau. E leai ni pepa e faamaonia ai suafa matai ma isi igoa, ma ua le talitonuina lea talosaga ma teena ai.
O le isi na malaga mai le latou tina e asiasi i Niu Sila i se visa mo tagata tafafao. Ona taunuu mai lea o le tina taofia e le falemai ona taumafai loa lea e fai pepa nofomau. Ua teena lea talosaga ona o le tagata e mai. Ona e leai se inisiua na faia a le tina lea, ua faatonuina le aiga e totogi le pili a le falemai e $20,000. O le Malo Samoa sa tatau ona latou talosagaina mo le fesoasoani aua le mai o le latou tina poo le faia o le travel insurance.
O le isi o le talosaga a le ulugalii faapea o le la fanau moni o loo nofomau i Niu Sila. Na teena lea talosaga ona o tamaiti ua liliu faaletulafono (adoption) ma ua le toe aia i ai laua o matua moni, aua ua fai ma fanaufai a le isi aiga.
O le isi talosaga, o le tagata ua ovasitaia o loo nofo i le fafine sitiseni Niu Sila, ae e lei faia se nofomau. Na maua ua ovasitaia ona ua molia e leoleo i le solitulafono, faatoa fai loa le talosaga mo le nofomau. Ona saili lea o ni tusi lagolago mai se faifeau a o le faalavelave ua solitulafono ma e le o se tagata e lotu. Mulimuli ane ua falepuipui, sola le toalua, ma ua fuafua nei a maea lana faasalaga ua tipoti i Samoa.
O le isi talosaga, o le ulugalii o loo nofomau i Niu Sila, ae ua mananao e aumai le isi a la tama o loo i Samoa. E suesue atu e le Ofisa o Femalagaaiga e le o taua lea tamaititi i le uluai talosaga na maua ai o la nofomau. Ua fesiligia nei pe mafua aisea na le taua ai le la tama lea, ae tali le ulugalii o laua e lei malamalama i le fesili. E le gata ua teena lea talosaga, ae ua suesueina le ulugalii ona ua le amiotonu i le faatumuga o le la talosaga muamua.
O ala o le tulafono a Niu Sila, e le mafai ona e faapea e te lei malamalama i se mea. O oe lava e pau i ai le sao ma le sese o au faaupuga i le faiga o talosaga mo le nofomau.
E ao ia te oe ona e malamalama lelei ae e te lei faia lau talosaga. O se mea tatau lou silafia lelei o vaega o le tulafono e maua ai sou avanoa mo se talosaga. O se mea tatau foi lou malamalama poo iai se avanoa e apiliina ai se faaiuga ua faia e le matagaluega o femalagaaiga. Ae afai lava ua teena lau talosaga, ma ua teena sau apili sa faia i le minisita o le Malo Niu Sila, ou te talitonu lava au ia, o se mea tatau loa lou faaaoga o le talosaga a le Malo Samoa ua faaalia mo latou o loo ovasiteia i Niu Sila – e maua lou saolotoga i Samoa.
