(Siana Fotu Su‘a Paane – 80 tausaga)
Ua aofia moli i le futiafu e tasi ina ua fegasa‘i sega‘ula ma faatasia aiga i le alofa o le Atua.
O le Aso Toonai 23 o Fepuari sa feofoofotai ai lagona o le fiafia e ala i le soifua tuutulu‘i o le tina matua ia Siana Fotu Su‘a Paane mai Papa Sataua ae o le tele o lona soifua sa soifua a‘e i Toga ma faaipoipo ai i se tamā o lea atunuu.
Sa faamanatuina lona 80 tausaga ma sa taitaia le sauniga e le susuga ia Bishop Kepu (Uarota Toga) o le Ekalesia a Iesu Keriso o le Au Paia o Aso e Gata Ai. O le alo o le tina matua, Vaetoeifaga Alisa sa faatautaia le faamoemoe.
O le faafetai a aiga na lua sa saunoa i ai le susuga ia Su‘a Faavae na malaga mai Niu Sila.
Na faaalia le valevale alofa e ala i tu ma le aganuu a Samoa faapea le aganuu a Toga. Sa faatumulia i aiga ma uo faapea nisi o faafeagaiga ma faletua sa auai.
Manuia tele le faamanatuina o lou 80 tausaga Siana Fotu Su‘a Paane. O alofaaga mai lau fanau, fanau a au fanau, faapea aiga uma i Ausetalia, Niu Sila, Samoa ma Toga.
