E mautinoa le malosi o le finagalo o le Afioga Tuala Iosefa Ponifasio i le mataupu lenei, ona e unai mai lava isi mataupu o le Faiga Palota a le Vaega Faaupufai o le Tautua Samoa i lana fonotaga ma Tusitala, ae tau faaavanoa mai lava le mataupu lenei a le afioga i le sui tauva.
Ina ua amata lana folasaga na ia ta‘ua ai, e lē o unaia mai lenei mataupu i sona tulaga faa-Loia poo sona tulaga o ia o se tagata tauva o le Palota, ae o lona manaoga ia faalauiloa le matautia o le isi laasaga fou lea ua vaaia i Samoa, o le faatu ai o se nofoaga o le a faapea ona faaliu efuefu ai tino maliu.
“E matuā feteenai lava lenei ituaiga faiga ma tu ma aga faa-Samoa aemaise o tu ma aga faa-Kerisiano, ia e faavae ai le soifua o tagata Samoa,” o lana saunoaga amata lea.
“Soo se faigamalo latou te talia lea ituaiga faiga ua agai i faiga ma talitonuga faapaupau, ma o se mataupu e faigata tele auā e lē tatau ona talia e lo tatou atunuu.
O se faaiuga foi ua agai lava le Malo sa iai nei ma faatino e aunoa ma le tapa o se finagalo lautele o le atunuu, e tatau ona iai se manatu o le atunuu i suiga faapenei”.
Faaalia e Tuala le faateia ina ua molimauina i luga o le televise se sauniga na faamautu ai loa ma le avatu o le galuega mo se nofoaga e faatino ai lenei galuega i se konekarate a Samoa.
Na faalava le tusitala a le TV One o Nanai Laveitiga Tuiletufuga ma taumafai e faamalamalama i le sui tauva o le Tautua Samoa, o le faiga o le galuega lenei na manino mai lava i le saunoaga a le Alii Palemia, o se faiga lenei ua tuu atu lava i le faitalia ma le aiā tatau a le tagata poo le aiga Samoa latou ina ia faatino pe leai.
Ae o lana saunoaga na faapea mai ai foi, e aogā foi e tagai i ai le atunuu i le taugofie ai o le tau saili o se pusa maliu poo le tau fai foi o ni tuugamau, ma o se faamāmā avega foi.
O le saunoaga a le Alii Palemia e sefe mai ai tupe e alu i le tele o sauniga ua vaaia i mea nei o maliu.
Faaalia e Tuala, o le tupe o loo faatino ai le galuega lenei o tupe a le atunuu auā e sili laititi atu i le $1miliona tala Samoa lea e alu ai i le Konekarate a Pa‘u Sefo Pa‘u, latou te fausia ma vaai lelei masini moomia mo le faaliuefuefu ai o tino maliu e oo atu i lea nofoaga.
O le a fausia ai foi i le lotoa lea se nofoaga mo tapuaiga auā toe sauniga o ē ua maliliu. Faaalia e Tuala, aisea la ua agai sa‘o ai lava le Malo e fai lea faaiuga i tupe a le atunuu e aunoa ma le tapa o se lagona o le atunuu? O Tuala ua na o se tasi o le tele o failotu, aemaise isi tagata lautele o le atunuu ua lagalagā mai le mataupu lenei.
O le mau a nisi e leai se vaega o le tala‘iga o le tala lelei ma le olaga faakerisiano ua ta‘u mai ai le talia e lenei talitonuga o le susunu o le tino o le tagata se‘i tulou le aufaitau.
“O a‘u foi ma lo‘u iloa i le matou lotu, le Katoliko Roma, e lē talia ai lenei ituaiga faiga, ma e mautinoa foi i le tele o ekalesia kerisiano i Samoa, e leai ma se isi e talia nei faiga ua faatu i Samoa”.
Ta‘ua e Pa‘u Sefo Pa‘u ina ua tatala aloaia le amataga o lenei galuega, e feololo lava le numera o tagata ua o latou talosagaina lenei auaunaga i Samoa, aemaise lava i tagata mai i fafo o loo nonofo i Samoa ua tele ina talosaga mai o latou aiga pe a maliliu pe mafai ona faaliu efuefu o latou tino maliu e faigofie ai le avatu i fafo.
E lē gata i lea na ia ta‘ua ua ese foi le vaai a le toatele i lenei vaitau auā e iai isi aiga e leai ni fanua e teu ai ē pele ma e iai lava nai tagata ua laga le faatino o lea ituaiga tautua ona o tulaga nei.
“Ou te iloa ua iai a‘oa‘oga faakerisiano e faapea mai a maliu le tagata ua alu ese le agaga alu ese le tino, ae ou te talitonu lava e lē o se auala lea o le a mafai ai ona talia lea ituaiga faiga ma o le faa-Samoa e lē mafai lava ona talia ai lea tulaga ona o loo vaaia i le sau ai i le talafaasolopito o le susunu o le tino o le tagata o se faiga faapaupau ma tufanua”.
Faaalia e Tuala e popole tele foi ona o se tasi lenei o le tele o faiga fou ua lē amanaia ai lava le talitonuga faakerisiano o loo faavae ai Samoa – ma e tumau pea lona teena o le tulai mai o lenei ituaiga nofoaga mo maliu i le atunuu.
O le nofoaga fou lenei ua faatuina nei i Tafaigata i le fanua tanu o le Malo o loo iai nei. O le isi tulaga na ta‘ua e lenei tamalii e faapea, e toatele e susunu loa le tino maliu liu efuefu atoa.
“O ponaivi se‘i tulou mo le silafia e lo tatou atunuu e lē mafai ona liu efuefu i le faato‘ā susunu atu o le tino, e leai, e tatau ona nuti ona faato‘ā mafai loa lea ona susunu ma liu efuefu ai ma e umi se taimi e faatino ai lea tulaga, o lona uiga a vaavaai lelei i ai tagata Samoa i lenei ituaiga faiga, ailoga e mafai ona o latou talia le faia o ia tulaga i nisi e pele i aiga”.
