E le ono iloa ni tausaga e faaono agai ane ai le malo e ave le Sisiga fu’a e talimalo ai Savaii, meaane, o lea ua iai nisi o polokalame tetele a le atunuu ua faase’e atu e talimalo ai le motu i Savaii.

O le tausaga fou lea o le a agai ai fusuaga o taaaloga a le pasefika e talimalo ai Savaii, ua maea le taligamalo a Savaii i le sailia o se Tausala Samoa e pei ona faatoa mae’a atu nei, ae ua faapea foi ona iai le fuafuaga a le malo, e talimalo Savaii i le Teuila, i le tausaga 2020.

I le tali mai a le Palemia na ia faalia e faigata tele ona faia lea tulaga ona o le toatele o tagata o lo o aumau i Upolu nei.

“E faigata tele le mea lena, faigata tele leaga o tagata uma o loo iai nei, o tagata mamalu uma o lo o i Upolu nei, o lona uiga e na o le pau lena o le Sisigafu’a e na o le toatolu tagata e i ai.”

O le talimalo o Savaii i fusuaga o taaaloga o le Pasefika i le tausaga fou, na lagalaga ai loa manatu ma finagalo o le mamalu o le atunuu pe le faaono i ai se tausaga e avatu ai ma le Sisigafu’a se’i talimalo ai le motu tele.

O le talitonuga o Savaii, afai o le a talimalo i taaaloga faavaomalo i fusuaga, lona uiga e leai se eseesega tele ma le Sisigafua.

O nisi manatu faalia, o loo faatino e nisi o le atunuu a latou sauniga aloaia i atunuu i fafo, e sisi ane ai le tagavai o le atunuu, e ui ina e le tatau ona faia lea tulaga. Faimai le finagalo o se tasi o tamaalii, e tau talafeagai le sisi o le fu’a i Savaii nai lo le sisi i atunuu i fafo i se pitonuu o lo o toatele ai tagata Samoa o lo o aumau ai.

O loo taitaina le finagalo o le tamaalii e musu e faailoa lona suafa, i le mau tauave a le vaega faaupufai e puipuia aia tatau a Samoa, le HRPP, o le mea e lelei mo Upolu e lelei foi mo Savaii.

O le taligamalo foi a Savaii i le sailiga o se Tausala Samoa, na matua iloga le pati ane o le mamalu o le atunuu o loo alala ma afifio i Savaii e lagolago le faamoemoe, aemaise i aulotu taitasi ma Ekalesia i Savaii.

O se faaliga na saunoa ai se tasi o ofisa sinia o le pulega o Tagata Tafafao Maimoa Fafo, e le faigofie ona fai le tulaga lea, ae atonu o se faiga fou  lelei foi, peitai a silasila mamao i ai e le taitai ona latalata mai ni tausaga e faaono faatino ai sea faiga.

“Ona e fua foi i femalagaiga aemaise ia talafeagai lelei ma manaoga o malo mai fafo, o lona uiga e le faigofie.”

“E le faapea o se vaai maualalo i le taligamalo o le motu tele i Savaii, ae o vala ia o le mataupu e ao ona silasila i ai, ma e ao ona vaai lelei a’o lei faia i ai se faaiuga, tatau ma talafeagai.”

Talu ai i faatalanoaga ma le taitai o le atunuu, e faatatau lea i le faailogaina o le sisi ina a’e o le tagavai o le atunuu i atunuu i fafo i vaega o loo tele ina aumau ai Samoa, na ia faalia manino le le tatau ona fai lea tulaga.

Na saunoa le palemia e na’o Samoa lava e tatau ona sisi ai le fu’a a Samoa, ma e leai lava se isi nofoaga e ao ona fai ai lea tulaga mamalu a le atunuu.

Ae o le finauga a le mamalu a le atunuu o loo aumau i fafo, ua na o se sauniga, e tau ona faamanatu ai, ae le fai a’i. Ua na o se sauniga, e faali ai foi lo latou manatu faamaualuga i le tulaga maualuga o lo o faatulaga ai Samoa i isi atunuu o le pasefika.