O le a toe matamata tetele igoa o Samoa ma Niu Sila i le vaai ma talafaasolopito o atunuu uma o le lalolagi e fiafia i le taaloga o le lakapi, ona o le ata faatagata telē o le alii taalo lauiloa o Laauli Michael Jones, o se tamafanau a atunuu e lua, ua tutu’i ma faamautuina i lumafale ma le faitotoa ulufale i le malae lakapi faavaomalo, le Eden Park, i Mt Eden i Aukilani tutotonu.
O le matatia na ausia e lea tamalii o le atunuu, i le taamilosaga muamua a le IRB i le tausaga e 1987 na faia i Niu Sila. Na faamauina ai o Michael Jones, sa ia kolisia le laina sikoa, ma o le uluai sikoa foi lea o le taaloga muamua a le Olopeleki i le uluai taaloga o le taamilosaga i lona tatalaina, talu ona faavaeina mai le Ipu o le lalolagi.
E lē gata i lea, a o le uluai taaloga foi lea a Michael Jones mo le aulakapi a Niu Sila, le Olopeleki ina ua filifilia e fai ma amepasa o Niu Sila i lana taleni o le lakapi.
Na matuā tumutumu le vaega pito i luma o le faitotoa ulufale o le malae i Eden Park i lea afiafi o le Aso Faraile, aso 26 o Aukuso, i le toatele o le aufaasalalau ma le autusitala, o aiga ma uo, ae faapea foi sui o kamupani, ma le pulega o le malae ma le Iuni lakapi a Aukilani, auā le susueina ma le faalauiloaina o le galuega tele sa fausia ma tuufaatasia.
O le faatagata o Michael Jones sa kopi ma fausia mai i le ata na pueina e le alii pueata o le nusipepa o le Herard a Niu Sila, le susuga ia Geoff Dale i le tausaga e 1987, i le taimi tonu lava na fao ma tatao ai le polo i luga o le laina sikoa, e le susuga ia Laauli.
O lea galuega tele e lua tausaga sa fuafua ma fausia ai e le tamaitai o Natalie Stamillas, o ia sa muai mauaina lea miti ma faataunuuina ai. O le saunoaga a le tamaitai na tuufaatasia le galuega, sa ia ta’ua ai e tusa ma le 10,000 itula sa fausia ma faatino ai le ata faatagata e pei ona silasila i ai.
E tolu mita lona maualuga, ae 4.2 mita lona umi, ae tasi le tone lona mamafa, ma o le a mafai ona silasila uma i ai malo mai atunuu uma o le lalolagi e agai ane i taaloga o le Ipu o le lalolagi o le a faia i Eden Park, i fafo ane o le fale matamata a le ASB.
O le kamupani inisiua ma le CBL sa latou faatupeina auā lava le faatinoina o le galuega, ma o lona tau aofai e $300,000. O le susuga ia John Hart sa faiaoga lagolago i le Olopeleki i le vaitaimi lava lea o le 1987, sa fofogaina se tasi o vaega o le soifua taalo o Michael Jones mai lava i le taimi o avea Jones ma tama taalo i le Iuni lakapi a Waitemata i le itu i Sisifo o Aukilani, seia oo ina avea ma amepasa a Niu Sila i le Olopeleki.
E tele vaega tāua sa oo i ai le saunoaga a Laauli, peitai o se tasi o vaega sa mālie, ona sa ta’ua e Jones, o le sikoa na ia maua sa tatau ona sikoa ai Joe Stanley, pe a fua i le manaoga o le gaioiga sa faatino, peitai sa ia naunau foi e sikoa mo lana taaloga muamua mo Niu Sila.
O le ala lea e ui ina sa ia lagona le valaau atu a Joe e pasi ane le polo, ae sa ia faataliga tuli pea, ma tamoe sa’o i le laina sikoa ma tatao le polo, oti atoa ai ma le manaoga a le susuga ia Joe Stanley.
E ui ina sa faifai ane Joe ma ana paaga taaalo i lena vaitaimi ma ta’ua ai o le sikoa a Stanley, peitai sa ia lē toe popole i ai ona ua faamauina o le sikoa lava a Michael Jones.
Sa auai foi le afioga i le konesula o Samoa le susuga ia Faolotoi Reupena Pogi, ma sa faalauiloaina foi i saunoaga autū o lea afiafi, le faatasi ai o le sui o le malo o Samoa.
E lē gata i lea, ae sa faafetaia foi e Laauli i lana saunoaga, le konesula o Samoa ma ona aiga, ona o le lagolago ma le auai ane i le faamoemoe.
O le ata o Laauli Michael Jones, i Eden Park o le a lē galo ai, ma o le a manatua ai pea o ia o se amepasa numera tasi a Niu Sila i le lalolagi atoa mo le taaloga lakapi faavaomalo.
