E lē galo le Maota Faamasino tuai ma mea na tutupu ai

Taatia ia tala o le Maota Faamasino fou i Mulinuu o lea faatoa amata ona faaaoga, ae o le Maota Faamasino tuai i Apia e tele ma anoanoai toe lasi lona talafaasolopito.
O se maota sa faafoe faamasinoga ma galuega a le matagaluega o faamasinoga i le fogafale i lalo, ae o le vaega i luga sa iai le ofisa o le Palemia ma le potu fono o le kapeneta i tausaga ma faigamalo ua tuanai.
O se nofoaga foi e le galo i le toatele o si o tatou atunuu ua malaga ma aumau i Niu Sila, Ausetalia, ma Amerika poo isi atunuu o le lalolagi, aua sa agai i ai mo le liliuina o ni fanau, se faamasinoga o se uo poo se tagata o se aiga, poo isi lava mataupu sa faagaioia i le maota tuai.
E toatele foi tagata e manatua pea lea fale ona sa tulai ai i se solitulafono ma faasalaina ai i se sala tupe, solofua se moliaga, pe o le falepuipui.
O taualumaga faaiu a le faamasinoga i le maota tuai na faatoa mataga ai noataga o le au tusitala ma le au pueata i totonu, lea sa latou taumafai ai foi e pue le tautinoga a se molimau o loo suesueina.
Na faaalia e se ofisa sinia o le matagaluega o faamasinoga, o le a le galo lea maota tuai ona e tele mea matagofie sa tutupu ai, ae e iai foi nai sasi ma nai faaletonu sa tulai mai ai.
O se maota na fausia i taimi o pulega a Siamani i Samoa, sosoo ai ma le malo o Niu Sila lea na latou faavaeina le faamasinoga i le fogafale i lalo ma le uluai Faamasino Sili, o se alii Niu Sila na tofia i ai i le tausaga e 1920.
Ae talu ona faaaoga lea vaega o le maota mo faamasinoga ua toalua tamalii o le atunuu ua seei i le tofi Faamasino Sili ma galulue ai, e pei o le Afioga Vaovasamanaia Filipo ua tuumalo, ma le afioga i le Faamasino Sili o loo iai nei, Patu Tiavaasu‘e Falefatu Sapolu.
E manatua pea lea maota i faamasinoga o faigapalota i moliaga o faiga faatosina na toe soloia ai tofi o nisi na manumalo i se palota tele. Na soloia ai foi ma tofi faipule o nisi ona o nisi o soligatulafono na faasalaina ai i le falepuipui.
Na pau le faamasinoga e lei faafoeina i le maota tuai ua tapunia nei, o le mataupu lea na tagatavaleina ai se tasi o minisita o le kapeneta ma molia ai se minisita ma se tasi sa avea ma minisita. O lea faamasinoga sa faia i le maota o tupulaga o le ekalesia EFKS i Mulinuu.
E le o iloa se fuafuaga a le Malo mo le faaaogaina o lea maota e tele talafaasolopito o Samoa i ana suega malo o loo manatua ai, aemaise foi o taimi o pulega a papalagi ilo tatou atunuu.
O loo talosia ia iai se finagalo o le Malo e avea ma fale mataaga e teu uma ai measina ma tala faamaumau o le atunuu o ana pulega ma mea na tutupu aua tupulaga o le lumanai.