“O le tina amio lelei e sili lona tau i penina taugata”
O lagona ia ma saafiafiga o alo ma fanau a Aupeipeigamalie ma Luaia Tolai, faapea foi Fetaloloa‘i ma le tausi ia Tuaoloa Te‘a, o i latou ia sa tapenaina ma saunia le Aso Fanau o le tina ia Kolisi Tuaau.
O lenei faamoemoe sa tapenaina e aunoa ma le silafia e le tina. E ui ina vavamamao nofoaga o loo galulue ma aumau ai, ae sa maualuga i loto o le fanau “E le galo le alofa” o le tina ia Kolisi Tuaau i le tausiga o i latou seia oo ina matutua ma fai a latou fanau.
O le tina ia Kolisi e tasi lona alo, o Lafi, o loo aumau i Ausetalia. O le ala lea na tapena ai e nephews ma nieces se surprise party mo le tina.
O le aso 11 o Fepuari sa atoa ai le 70 tausaga o le tina ia Kolisi Tuaau, ae sa faamanatuina i le aso 13 o Fepuari i le Hall o Faletoi a le Ekalesia Metotisi Samoa i Otara.
Sa faateia le tina i lea taeao ina ua oo atu ua faatumulia le Hall i Faletoi i “Susuga Faafeagaiga ma o latou faletua aemaise le auvalaaulia, e le gata i lea, o ona aiga.
Sa taitaiina e le Tausi Matagaluega ia Salafai Mika le sauniga ae Tatalo le tamā Malolo ia Levaula. O le MC o le aso, o le Tausi Matagaluega mai Invercargill, Rev Masele Tolai.
“E le galo le alofa”. Matou te faafetai tele ai i galuega lelei ma le tausiga o i matou a o matou laiti seia oo mai i le taimi nei. E lagona i taimi uma le mafanafana o lou agalelei ma lou alofa faatinā.
Moomooga o le agaga ia maua nisi aso se tele o le mafutaga. Manuia tele lou 70 tausaga tina ma ia maua nisi tausaga se tele o lou soifua.
Alofaaga, Tuaau, Lafi & Dakota, Aupeipeigamalie & Luaia, Fetaloloa‘i & Tuaoloa, o ou aiga uma aemaise nieces & nephews.