“Ou te lē iloa pe o e silafia le mea lea, o le filifiliga o le taitai e filifili faaleaganuu ae o le filifiliga o le sui taitai e palota faale-ekalesia e leai ni sui faatutu ae tufa mai le fasipepa e tusi ai le suafa o le sui o le matou faafaletui ua manatu le tagata lava ia e tatau ona avea ma sui taitai”, o le faamaninoga lea a le afioga Fiame Naomi Mataafa i le faiga o le filifiliga a le faafaletui o le HRPP e sailia ai taitai o le latou vaega faaupufai.
Na maua le avanoa e faatalanoa ai lana afioga i le Faipule filifilia o Lotofaga o se tasi o sui faipule tamaitai pito leva lana nofoaiga i le tofi o lona itumalo i upufai o le Malo ma le atunuu.
Na mafua ona saili se finagalo o le afioga i le Sa‘ofaapito ona o le salalau ai o lipoti i le faia o le filifiliga a le faafaletui fou o le HRPP ma tusi aao ai e na te tauave le tofiga sui taitai.
“Masalo e te silafia o le tausaga e 1991 na uluai tofia ai a‘u i le Kapeneta e oo mai lava i le taimi nei o loo faapena ona ou lotolotoi pea i tonu fai o le Malo”.
Faaalia e le afioga Fiame o lona tulai mai i le tofi faipule o ia paeaiga ua mavae ma tausaga ua tuanai o lana nofoaiga faafaipule o le Palemene, sa leai lava sona lagona e fia oo i se tulaga taitai.
“Atonu o lea ua talafeagai foi le taimi o lo‘u filifilia ma le tulaga ua taoto ai upufai o le Malo aemaise lava o la‘u vaai ua tuanai taimi sa pei e fulisia sui o le Palemene i sui matutua o itumalo i tamalii ma failauga sa filifilia mai, ae o lea ua molimauina ua faasolo ina agai mai sui talavou i tofi nei ma ua filifilia mai foi e itumalo sui e iai o latou faailoga ma tomai faapitoa i soo se agavaa”.
E 12 palota na maua e le faipule o le itumalo o Palauli le Falefa le afioga Faumuina Faaolatane Tiatia Liuga ae 19 na manumalo ai Fiame Naomi i le sailia o se sui taitai. “O le sailia o se sui taitai i le mae‘a o le palota tele o le tausaga e 2011 na ou toe faaui i tua lo‘u suafa mai le taamilosaga ae ua lata ina maua sui e toalua e faia i ai le filifiliga faaiu a le faafaletui. Na ou iloa lava e itiiti numera o palota na ou maua ma ou fautuaina ai e toe aumai i tua lo‘u suafa.”
Peitai o le filifiliga i le mae‘a o le palota o le 2016 na faaalia e le Sa‘ofaapito sa lilo i lona manatu o le a iai se finagalo lagolagoina o lona faaauau pea i le taufetuliga mo le filifilia o se sui taitai.
“Ua lagona le faafetai i se vaega toatele o le matou faafaletui na aumai lo latou faatuatuaga ia te au, ae mo lou silafia e lē o se taimi muamua lenei ua ou tauaveina ai le tofi sui taitai ma le sui palemia”. Faaalia e Fiame o le taimi o faigamalo ua mavae sa faapena lava ona iai taimi sa ia tauaveina ai le tofiga ma ua ia silafia ai e lē faigofie.
O aiaiga o le faavae ua taoto ai nei e faatoa silafia e le Palemene se tasi o le a avea ma sui Palemia pe a faalauiloa e le Palemia i lana filifiliga o sana Kapeneta fou. E ui lava la ina avea o ia ma sui taitai ae o aiaiga ia o le faavae o loo iai nei.
Na ia faaalia foi o le Sui Palemia o le filifiliga tutasi lea a le Palemia. “O le tulaga lena o loo iai le faavae ae i lo‘u lava lagona ua pei ua masani ai lava lo tatou atunuu i le faiga sa sau a‘i o le tagata lava e sui taitai o ia foi lena o le a Sui Palemia, ma ou te iloa o loo iai pea lena faiga masani”.
O le faaiuga o le vaiaso nei ua faatulaga e tauaofia ai le Palemene lona 16 ma faatauto ai sui mamalu uma o le Palemene ua filifilia mai i le faigapalota faapea sui ua toe filifilia e aunoa ma ni palota a o latou itumalo na faia. O le a faatauto ai foi le Fofoga Fetalai ma le Sui Fofoga Fetalai faapea le Palemia. O le a fofogaina ai foi e le Palemia ma Minisita filifilia o lana Kapeneta fou.
