“Ou te lagona e lē fia tusia i le talafaasolopito o lo‘u olaga le aso ananafi (Aso Tofi, 16 Me 2013) ona o se aso na tofotofoina ai a‘u ma lo‘u faatuatua pe faapeī”, na saunoa ai Faumuina.
Ua faaalia e se faipule o le HRPP, e ui ina ua mae‘a ona soalaupule i le lotoifale o le faafaletui o le vaega faaupufai le tetee o nisi i le faatinoga o tiute o le afioga i le Minisita o Tupe le afioga Faumuina Tiatia Liuga, ae o le a lē muta ai le tuuina atu pea i le taitai ma le faafaletui o ni faaletonu e tutupu ma aliali mai.
Ae mo le afioga i le minisita o tupe, e ui ina faapea ua toe faatumau lona tofi minisita i le kapeneta i le matagaluega o tupe ae o le faaseā na tusitusia a nisi o faipule o le latou itu faasaga ia te ia, e lei faigofie ona o se luitau mo ia a o ia tauaveina ai le tofi faipule o lona itumalo o Palauli le Falefa mo le tolu ai lenei o paeaiga sosoo a le Palemene talu ona filifilia e lona itumalo.
Mo le silafia e le aufaitau o le afioga Faumuina Tiatia Liuga na uluai avea ma faipule i le faigapalota o le tausaga e 2001, ma filifilia ai e avea ma minisita o Galuega a le Malo. O le paeaiga na sosoo ai a le Palemene i le tuanai o le palota o le tausaga e 2006 na filifilia ai foi i le kapeneta ma avea ma minisita o le Matagaluega o Punaoa Faalenatura ma le Siosiomaga. O le faigapalota o le tausaga e 2011 na toe pale ai i le tofi o Palauli le Falefa ma filifilia ai loa e avea ma Minisita o Tupe lea o loo seei ai nei i le kapeneta.
“O le tulaga faigata ia te au e faigata ai ona ou toe talanoa i mataupu na laga ona ua uma ona ou tautala i mataupu nei i luma o le matou faafaletui. Ou te mautinoa ua taoto i paga le malamalamaaga o nisi sa talitonu o ni faiga e lē talafeagai faiga faavae o loo taatia ai galuega fai a lo tatou atunuu aemaise o le Malo”.
“O le mea e faigata ona ou toe tautala i ai ona ua uma ona ou faamalulu i sui ua tiga o latou finagalo ona o se pati ua sala ae e talitonu lava le tagata ia i ona manatu.” O se finagalo amata lea o le minisita ina ua maua se avanoa e faatalatalanoa ai e tusa o le mataupu na mafua ai ona fono faapitoa le faafaletui o le HRPP lea na faia ai le palota e saili ai se finagalo i le faamavae o le minisita o tupe, faaauau lona tofi minisita, poo le toe fetuunai o tofiga o minisita a le kapeneta poo le reshuffle.
O le tiga o finagalo nisi o faipule ona o nisi o mataupu e faasino i le minisita le afioga Faumuina Tiatia Liuga, e pei o le $600,000 na faaalu i lona ofisa, o le $1.7miliona o le taui ua totogi i le kamupani o le Siva afi, ma le silia i le tasi le miliona ua alu i le tusiga o le ata o le maketi fou i Fugalei, ae o lea ua tuai fausia le galuega ae ua toe faalēaoga le ata muamua o le galuega e pei ona sa faafogafalelua, ae o lea ua tasi le fogafale.
Saunoa le minisita o mataupu uma sa ia folasia i le feiloaiga ma nisi o faipule toatele o le faafaletui e to‘a 20 ona e lei auai nisi faipule o loo toesea ma le atunuu ona o tiute faalemalo e aofia ai ma nisi o minisita o le kapeneta. “Ou te lagona e lē fia tusia i le talafaasolopito o lo‘u olaga le aso ananafi (Aso Tofi, 16 Me 2013) ona o se aso na tofotofoina ai a‘u ma lo‘u faatuatua pe faapeī”, na saunoa ai Faumuina.
“Ou te faamagalo ia i latou ua tiga o latou finagalo, ae o le mea sili ma tāua ia te au ua avea le mea na tupu ma lesona lelei mo a‘u, ae ou te lē toe fia manatua auā a ou mafaufau pea i ai, o le a tupu a‘e se lagona fia taui ma sui, ae ua saunoa pea lo tatou Faaola e aua le taui ma sui”. Faaalia e le minisita o le galuega lea a le Atua o le taui ma sui, ma ua avea nei le mea na tupu ma faitotoa o le faaosofia pea o lona alofa ia i latou o loo ita atu, ae o le a ia faia pea le finagalo o le Atua o le faamagalo.
O le palota faalilolilo na faia e tolu vaega na autū i ai le sailiga o finagalo o faipule o le faafaletui. Muamua o le faamavae o le minisita, lua o le toe fetuunai o tofiga o minisita o le kapeneta, ma le tolu o le faaauau pea o le tofi minisita o tupe. O le taunuuga o lea palota faalilolilo e toasefulu na palota ioe e tumau pea le afioga Faumuina o le minisita o tupe, toafitu na palota e toe fesuiai le kapeneta, ae na o le toatolu na palota e faamavae loa le minisita. I se finagalo o le taitai o le Malo i le alii Palemia o le faauluuluga foi lea o le vaega faaupufai o le HRPP, na ia faaalia ai o lona manao lea ia faia le palota ina ia lē manatu ai nisi ua faatogafalea le mataupu.
Sa iai nisi o faipule matutua o le vaega faaupufai na faauilavea i le finagalo lea o le taitai, ae sa ia talosaga i ai o le a faia pea lana filifiliga i le faatinoina o le palota faalilolilo e pei ona toe faatumau ai pea le minisita o tupe le faipule o Palauli le Falefa.
