Ua alu le vaiaso ua tuanai o lagalagā finagalo o le atunuu i le tumau ai o le faasala o ni alii ona o le faia o soligatulafono matagā agai ia latou fanau.
Ua oo lava i taitai o le atunuu ua faaali le lē fiafia tele i nei sauaga mataga ua vaaia pea i Samoa. O le vaiaso foi ua tuanai ua faasala ai se isi tamā i le faiaiga faamalosi ma lona lava afafine.
O le vaiaso lenei ua laga ai e ni tina o se afioaga i Lefaga le ave i le Toomaga o Tagata Puapuagatia, se tagi ona e foliga mai e le o faia lava se faiga i se tamā ua latalata i le 70 tausaga le soifua mai i lea itumalo ua fanau ai lona afafine e 15 tausaga le matua. Na ia faia muamua foi i se teineititi na tuu i ai lona vaaiga ma fanau ai lea teineititi – o lana tama lea ua faaalia e lipoti mai i le afioaga ua toe fanau ai lava i lea toeaina.
Ua malosi finagalo o le atunuu i le sailia o auala e taofi ai lenei faiga faalealofa ae o le mau a le Faalapotopotoga o le Mapusaga o Aiga, le tamaitai pule o Salanieta Uesele Uili, seiloga lava e amanaia e tagata Samoa le Feagaiga ua ave ai le Faatāua i Aia Tatau a Fanau ma lo latou puipuiga, faato‘a mafai lea ona vaaia le tuuitiitia o lenei solitulafono.
“Ua leva ona sainia e Samoa lenei feagaiga ae o loo aafia lava fanau teine i le mau sauaga, e le o atoatoa le puipuiga o i latou nei e le mafai ona tali atu i sauaga ua faia ia i latou”.
O le matautia o nei solitulafono ona o le tele lava o loo faatino e tamā ia latou lava fanau poo i latou ua ave i ai le faamoemoega ma le faatuatuaga e vaai fanau laiti nei.
E le o asa foi se vaiaso ma le taunuu atu o tagi o sauaga matagā ua faia i fanau teine a Samoa.
I totonu o le Palemene na laga ai e le afioga i le sui a faipule o Sagaga le Usoga, le Afioga Muagututagata Peter Ah Him le tatau lava i le Malo ona toe tagai i le aumai o faasalaga e pei o le fasi o pagota ua faamaonia lo latou faia o nei soligatulafono matagā.
“Ina ia latou iloa ai o le tasi lea o faasalaga e o faatasi ma le falepuipui, ina ia latou lagona le tiga o lenei ituaiga solitulafono,” o se faaaliga lea a le Alii Faipule.
“Ua faitau pea i nei uiga matagā ma e tatau ona faaaoga le ofe e fasi ai soo se tagata lava e faamaonia le faia o nei uiga leaga”.
O se mau ua matua teena e le tasi o Faipule o le Itumalo o Safata le Afioga Palusalue Faapo II, lea ua faapea mai e le talafeagai ia ituaiga finagalo. Faaalia foi e le sui o le Asosi o Loia i Samoa o Rosella Viane Papalii, o ia foi le failautusi o le asosi lenei, e matua teena e le asosi le faatino o sea ituaiga faasalaga ona ua le talafeagai ma le tulafono.
O le unai a le Mapusaga o Aiga ina ia lē na o sauaga matagā e taulai i ai se taumafaiga e matua faamalosi ai faasalaga ae ia vaai le tulafono i le aofai uma o soo se sauaga ua faia i fanau i se faamoemoe faapea.
O le tausaga na tea nei lea na faamaonia ai e le Palemene teuteuga o le Tulafono o Soligatulafono e ala lea i le faaopoopo o faasalaga o i latou ua molia ma faamaonia le faia o nei uiga ma ua taufetuli faatasi lava le numera o alii o loo taofia faafalepuipui nei i sauaga matagā ma i latou ua faasala i fualaau faasaina.
O se taumafaiga na ta‘ua e le vaega o Sauaga i Totonu o Aiga, o loo tuu atu pea i le Vaega o Suesuega Faapitoa a Leoleo ona ua maualuga atu lona faasalaga mai isi solitulafono e faatatau i sauaga i totonu o aiga. Ta‘ua e Sina Tafua le taitai leoleo o lea vaega, o sauaga uma nei i totonu o aiga ma e aofia ia latou galuega, ae o le maualuga o faasalaga ia ua tuu atu ai loa ia mataupu i le vaega a le CID.
E ui i galuega ua unaia i itu eseese o le atunuu ina ia tau tuuitiitia nei solitulafono, ae foliga mai o loo faatali lava nisi o aiga o loo tulai mai ai nei faafitauli seia tulai mai ni suiga ogaoga o nei soligatulafono ona faato‘a lipoti lea, pe maua atu foi e se isi tagata ese le faia o ni sauaga faapea ona faato‘a lipoti lea.
E pei o le mataupu fou lea ua laga mai i Lefaga, o le vaavaai o nisi o tamaitai o le afioaga ma ua faamausali lo latou iloa o le tamā lea e lata i le 70 tausaga, o ia faia uiga matagā i lona afafine, ua faamalosia ai nei lo latou agai atu i lenei vaiaso i le faalapotopotoga o le Toomaga o Tagata Puapuagatia ina ia saili auiliili le mataupu e i latou ma ia faia se tagi faasaga i lea tamā mai le itumalo.
I sauaga matagā lava ia ua faaalia e Leoleo e oo atu i le tolu tagi i le vaiaso i lo latou ofisa. Ua ese mai lea i isi faalapotopotoga ua feagai ma faafitauli faapenei o loo faapea foi ona faato‘ai i ai talosaga a nisi o le atunuu ua le agai i Leoleo.
