Tusia: Rosa Tamala Fiu
Perisipeni
Ua ea le pologa ma ua faaitiitia foi pili telefoni. Leitioa foi Solomona a saafi i le alofa, lea ua tau ai lau ma faanaunauga o le tama Ainiusami e fia mafuta mai i le taupou o le Ma‘atā.
E soo tulutulu a Melepone ma Kuiniselani i le silasila a le alii o Elijah Lemalu e pei ona tauasa mamao mai ai ma ona aiga ma uo e osi feagaiga ma le tamaitai o Ida Vaili e pei ona tuufaatasia ai e ala i le sakalameta o le faaipoipoga, i le Malumalu Sā i le Aso Toonai aso 30 o Iuni. (Ekalesia o le Au Paia o Aso e Gata ai)
O tuaa o le faatoafaiavā o Laulu Vilivili ma Tuli Lemalu (Matautu Lefaga & Faala Palauli) a o tuaa o le faatoanofotane o Seve & Maioa Vaili (Fagafau, Samata & Satoalepai & Papa Sataua). Sa fai ma fofoga o le aso le tofa ia So‘e Saulo So‘e e faafeiloaia le paia o le atunuu.
O le fetalaiga ia Lealuga sa fai ma fofoga o le auvalaaulia e faafetaia aiga na lua ona o faaaloaloga masani na faatinoina i lea aso ona o pelega o fanau.
O le fetalaiga ia Lagaaia Kuinisē sa fai ma sui o le paia i aiga auā foi se matū palapala o le aufaigaluega a le Atua ma Samoa na potopoto.
O alofaaga mai o lua mātua, aiga ma uo faapea uosili ma aumea mamae aemaise le aumalaga mamalu a lau Uarota Elijah ma uo mai Melepone.
Ia manuia le aiga fou ma ia fua tele le niu ae sili ai ona faamuamua le Atua ma alolofa i aiga.
