O se vaega i luma o le maota o le faafeagaiga o le EFKS Vailima o le fogafale i luga e alala ai le faafeagaiga o lona faletua ma le nofo a alo, ae o le fogafale i lalo o le hall mo meafai a le aulotu

O se vaega i luma o le maota o le faafeagaiga o le EFKS Vailima o le fogafale i luga e alala ai le faafeagaiga o lona faletua ma le nofo a alo, ae o le fogafale i lalo o le hall mo meafai a le aulotu

E $477,000 le tau o le maota o le galuega e alala ai le faifeau ma lona aiga, o le hall ma isi maota mo galuega a le aulotu EFKS i Vailima ua umusa ma tatala aloaia. E ta’u loa galuega tetele faapea e lē mafai ona ‘asa ma le vaega e tomumu ma musua e pei ona molimau mai le susuga Faasalafa Vitaoa o le faafeagaiga o le ekalesia ina ua fesiligia e tusa ai ma le galuega ua mae’a. “E lē mafai lava ona leai se tomumu i galuega faapenei, ae e eseese foi aulotu ma auala e faatino ai le faiga o se galuega. O matou sa fai la’u tala i le aulotu a iai le tagata ua alualu ua vaivai fai se malologa ona toe faaauau foi lea”. Peitai na faaalia lava e le faafeagaiga o le latou galuega e leai ma se isi na faavaivai.

O sailiga tupe a le aulotu i lafoga a matafale e 42, o taaloga bingo ma se leitiofoni na fesoasoani i le faatupega o le galuega. Na faaopoopo iai ma se nonogatupe e silia i le lua selau afe tala o loo faamalumalu ai le aao o le ekalesia aoao a le EFKS. O le alofa o alo ma fanau a le aulotu ma le afioaga i Vailima i Ausetalia ma Niu Sila o isi ia seleni na tafe atu i aao o le faifeau ma le aulotu. Na faamatala le susuga Faasalafa e ui ina alualu le galuega ua puupuu le aao o le ekalesia, ae o le Atua e lē gata lona aao e faasino atu auala e saili iai mo le maua o se fesoasoani.

O le susuga Faasalafa Vitaoa o le faafeagaiga o le EFKS i Vailima a’o tolaulau le tala o le galuega

O le susuga Faasalafa Vitaoa o le faafeagaiga o le EFKS i Vailima a’o tolaulau le tala o le galuega

O le fanua o loo tu ai le maota o le galuega o se tasi lea o vala sa feagai ma fuafuaga o le galuega ona e manaomia i le talosagaina o le pemita e fau ai le maota pepa o faamaumauga o le eleele. O le afioga Li’omatua ma le faletua o Si’ulepa ma o la alo e umia le fanua, peitai na faafetaia e le faifeau lea tamalii ma lona aiga ina ua agai iai se savali mo pepa o le fanua.

Na ta’ua e Faasalafa na talia fiafia e Li’omatua le savali ona sa saini pepa ma tuu atu le fanua e fau ai le maota o le galuega ma isi fale e tua iai le aulotu ia latou fuafuaga fai. O loo aitalafu o le galuega ma o seleni na aoina i meaalofa mai le valaaulia faapea tamafanau a le aulotu ma le nuu ua fesoasoani i le aitalafu.

E lata i le luasefulu le au malaga o le mafutaga a tamafanau a Vailima i Niu Sila sa auai i le umusaga. Sa fai ai le latou taalolo ma momoli le latou meaalofa tupe e $36,000 tala. O le taumafataga felanulanuai ma faaaloaloga masani o sua sa tapena iai le aulotu mo malo valaaulia aemaise o faafeagaiga o le Pulega ma le Matagaluega a Apia. E oo lava i tusitala ma vaega faasalalau eseese sa auai na faaaloalo iai le ekalesia i taumafa ma pasese.

Nisi o sui o le mafutaga a Vailima i Aukilani na auai atu i Samoa i le umusaina o le maota o le faafeagaiga

Nisi o sui o le mafutaga a Vailima i Aukilani na auai atu i Samoa i le umusaina o le maota o le faafeagaiga