O se vaega o le mafutaga a Lotofaga sa faia le latou posiva mo le malumalu EFKS i Samoa

O se vaega o le mafutaga a Lotofaga sa faia le latou posiva mo le malumalu EFKS i Samoa

E lē o toe po se lilo i le silafia o nisi, o loo fesiligia ai pea le ‘auga o le vaeluaina o le mafutaga a Lotofaga i Kuiniselani, peitai, o le tali o loo taoto lava i totonu o nei mafutaga e lua. O le filifiliga foi o le loto e tuusa’oloto i le faitalia o le tagata lava ia, pau lava o lea, afai o se auala lelei  e maua ai le nofo filemu, ua alagatatau lava ma talafeagai. Na auina atu i la tatou lomiga i le masina o Iuni o le tausaga nei, le posiva a le isi mafutaga a Lotofaga lea sa malaga mai ai le afioga i le Sa’o Faapito ia Fiame Naomi.

Peitai, o se vaega lenei na totoe mai o le mafutaga na uluai amataina i Brisbane ina ua taunuu mai se tusi mai Samoa ma faatalauula mai mo se fesoasoani i le Malumalu o le Atua EFKS i totonu lava o Lotofaga. Na tuumuli nisi ma taumafai mai le isi itu, a’o le ‘auga lava e tasi o le fia fesoasoani atu i le fausiaina o le malumalu o le Atua a le ekalesia EFKS o loo tausia e le susuga ia Rev Iosefa ma le faletua ia Cekie Uilelea faapea le paia i le Ekalesia.

E ui na’o se vaega itiiti o nai aiga o totoe mai, ae  laualuga le lototetele ma le naunau e finau ai i mea lelei, lea ua o latou faia lava ua mafai.  Ua tolu ai nei o tausaga talu na tuua na’o se vaega lenei o le mafutaga.

Ua iai a latou teuga tupe e ala i a latou sailiga seleni sa faagasolo mai talu na tuua na’o latou, auā o le mafutaga lenei na amataina ai le mafutaga a Lotofaga e ui ina tuumuli nisi ae alo pea lo latou sa. E maeu foi le tasi o loto o nei tagata, latou te lē fia sailia nisi tulaga ma tusitusilima poo ai e sa’o, ae pau lo latou faanaunauga, ia tali atu i le faatalauula mai i Samoa.

O le Aso Toonai, 24 o Novema na faia ai le posiva a Lotofaga i le Tiafau Hall a le EFKS Southwest Brisbane. Na muai sii le viiga ma le faafetai i le Atua, e ala i le sauniga lotu sa taitaia e le Toeaina Faatonu o le matagaluega  EFKS a Kuinsiselani i Saute, susuga ia Rev Elder Taua’aga Mata’afa ona faagasolo ai lea o le faamoemoe.

O le failautusi a’o le mafutaga, le tofa ia Malaesilia Tini Faitala sa faafeiloaia le auvalaaulia ma faatamo’eina  polokalame o le aso. Na faagasolo siva  Samoa a matafale aemaise o i latou sa ofo alofa atu ma lagolago le faamoemoe e le gata o se vaega o le EFKS ae faapea le Ekalesia Katoliko. Na manuia le faamoemoe ma tauaaoina ai le aao mafola o tau aiga, uo ma e masani e tusa ma le $30,000.00. Na agalelei foi le susuga i le Toeaina ia Rev Elder Tauaaga ma le faletua ia Senerita Mata’afa faapea foi le susuga ia Rev Faasoi ma le faletua ia Taleta Maua e ala i a latou saasaaga faa Samoa.

Ua faaopoopo lenei ma’au ma le milomilosia o le mafutaga lenei faatasi ma latou teuga tupe o loo teu.

Ua fuafua e feiloai i Samoa i le aso 26 o Tesema ma sauni e tauaaoina atu i le faifeau ma le ekalesia EFKS  lo latou sao a’o loma ai le faapaiaina o le ala o le Atua i le masina o Tesema o le tausaga nei.

O le susuga ia Fialua Nafatali sa faafetaia le auvalaaulia ona o le aao foai, faapea  faaaloaloga, a’o le tofa ia Agaimalo Lealuga sa fai ma sui o le auvalaaulia e faafetaia le Mafutaga ona o le aao mafola e ala i meaalofa sa saunia faapea le taumafataga sa tapenaina e le Uncle Sam’s Take Away & Catering.

O le laulau a fono a le Mafutaga lenei a Lotofaga: Taitaifono – Fialua Nafatali; Failautusi – Malaesilia Tini Faitala; Teutupe – Maota Galuvao.  O sui auai e aofia ai Onelau Cordtz, Sueina Cordtz ma Korina Tini Faitala.