Ou te faatalofa atu i lau tapuaiga Samoa. Malo lava le soifua maua ma le lagi e mama. Malo le onosai i le tele o faafitauli o loo feagai ma o tatou aiga, aemaise ona o le faaletonu o le tamaoaiga o loo iai nei Niu Sila.
E momoli atu lau faafetai i le afioga ia Sala Sally Nesham, o ia lea o loo faamaoopoopoina le tauvaga matagofie o le Miss Samoa Niu Sila. Ou te faafetai foi i le lagolago malosi a le Malo Samoa i tausaga taitasi i lea tauvaga, e auala mai i le afioga i le alii sui palemia, Misa Telefoni. Ou te talitonu o le lagolago malosi a le Malo Samoa le afifio mai ai o le afioga i le Ao Mamalu o le Malo Samoa, le afioga i le Tuiatua Tupua Tamasese Tupuola Efi ma lana masiofo, i le tauvaga lea na faataunuu i le Aso Toonai, 25 Iulai, i le maota o le TelstraClear Pacific Centre i Manukau. O le auai foi o le afioga i le Ao Mamalu o le Malo Samoa i lea po ua faaalia ai lona faatauaina o tupulaga talavou o Samoa ma a latou taumafaiga i lenei atunuu ua tatou aumau ai nei. Faafetai i lona faaeaea atunuu i lona auai mai e lagolagoina le Miss Samoa Niu Sila 2009.
Ou te momoli atu foi le faamalo ma le faafetai i le tamaitai o Christina Tulipe Faafili, o ia lea na sili aoao i le Miss Samoa Niu Sila 2009 i lea po. O le a sauni atu nei lea alo e fai ma sui o Niu Sila i le tauvaga tele o le Miss Samoa e faia i le Teuila i le masina o Setema. Ia manuia lou alo faiva ma o ou mama na.
Ou te fia momoli atu foi le faafetai i tamaitai uma sa tauva faatasi i le Miss Samoa Niu Sila 2009. Malo le tau, malo le tauivi. E ese le matagofie o a latou tapenaga ma sauniuniga. E taua tele ia te au, tali o fesili sa latou taumafai i ai aemaise mataupu taua sa latou taumafai e faalauaiteleina ia latou faaaliga taleni e pei o le fuafua tatau o taumafa mo le soifua maloloina.
Ou te faafetai foi i matua ma aiga sa auai i lea po i le lagolagoina o o latou alo sa auai i le tauvaga. Sa ou maitauina le agaga faafetai o nei tamaitai sa tauva ona o le avanoa e auai ai i lea tauvaga. Fai mai o le taua ia i latou o le Miss Samoa Niu Sila ona o le maua ai o le avanoa e faalauaiteleina ai lo latou malamalama i tu ma aga faa-Samoa.
Sa maitauina foi le toatele o le tupulaga talavou ua auai i lea po na faaalialia lo latou lagolago i le feei ma le pisapisao a o faagasolo le tauvaga. O nisi o taimi ua le lagona lelei faamatalaga a tamaitai tauva ma i latou sa faafoeina le polokalame ona o le vavao o le tupulaga sa auai atu i lea po.
Sa ou pueina le musumusu a se tasi tina i se isi tina i ou tafatafa e faapea; “matua le mafaufau tele”. Ua ou manatua ai aoaoga ma faamatalaga a tuua o Samoa e faapea, ‘e iloa gofie le alo o le tamalii i lana amio, i ana aga ma ana taga, i lana savali, lana tu, nofo, ma lana tautala’.
Atonua ua faapea nisi o tupulaga o i latou o Samoa ona e fananau mai i matua Samoa ma o loo latou umia suafa Samoa. Peitai ane o amio e le o ni amio o se tamalii Samoa. Ou te le iloa poo malamalama nei tupulaga Samoa o Niu Sila, o loo afio le Ao Mamalu o le Malo o Samoa, o le afioga lea i le Tuiatua, o le tupu o Samoa.
E masani ona ou faalogo i faamatalaga a nisi o le au matutua e faapea, na o Samoa lava e iloa faaaloalo, e iloa le va nonofo, ma le va fealoaloai ma tagata. O le upu masani foi a nai ou matua, e fafaga fanau a manu i fua ma lau o laau, a o le tama a le tagata e fafaga i upu’.
Ou te talosagaina tatou matua ina ia taumafai e maua se avanoa e fafaga lelei ai alo ma fanau i upu o le faaaloalo, upu o le va nonofo, ma le va fealoaloai.
E iloa lelei le tamalii Samoa i lana amio, i lana aga ma ana taga.
Ia manuia galuega ma fuafuaga o le vaiaso fou.
