E iai pea le naunautaiga e toe fausia atinae turisi i Samoa

O le faaleagaina o nisi o apitaga tu matafaga atoa ai ma nisi o faletalimalo laiti i afioaga na aafia i le tsunami ua matauina lelei i fonotaga ua sosoo ona faatautaia i le va o ofisa o loo vaaia atinae faapenei i Samoa ma le Pasefika faapea ai i latou e ana nisi o nofoaga nei na matua faaleagaina i lea faalavelave tele.
O le alii Ofisa Sili o le Faalapotopotoga o Tagata Tafafao maimoa mai i fafo i totonu o le Pasefika atoa, o Tony Everitt lea na i Samoa i le talanoaina o auala e mafai ona faamalosia ai lenei atinae tele i Samoa aemaise o le fofogaina ai o nisi o lipoti mai ia i latou e ana apitaga tu matafaga ma faletalimalo na faaleagaina i le galulolo.
O ia faatalatalanoaga na manino ai o fausaga o le tele o fale nei aemaise lava i apitaga tu matafaga, na manino le afaina ai o soifua o nisi na lavevea i meaafale e pei o apa ma pou na toulu ma tafefea i le sami.
O ni fausaga e faigofie ona faatautaia ai atinae e pei o faleoo sa tele ina nonofo ai tagata tafafao, ae faapea foi nisi o faletalimalo.
Talu ai o lea tulaga ua talanoaina nei le taua o le mautu o nofoaga nei ma ia saogalemu ai tagata asiasi mai pe a o latou faaaogaina. O le isi atugaluga na faaalia e nisi o i latou i totonu o lenei atinae o le itu lea e lei tele nisi na malamalama i le faatinoga o le tali atu i taimi e tulai mai ai faalavelave faapenei.
O le faletalimalo o le Sinalei e iai lana sailini ma na faalogoina lea faailoilo i le taeao tonu o le lulu o le mafuie ae o le tele o isi faletalimalo aemaise foi i fale Samoa ia e fausia i luga o le matafaga sa leai lava se lapataiga na latou maua ma o vaaiga e pei o le vave ona me‘i o le sami agai i tai, o le taufetuli agai i le mauga, o taifau ma le lulu lava o le mafuie na mafua ai ona faasaoina nisi e lei faatali mo le taina o le logo.
O le fautuaga mai i lenei fonotaga, ina ia mafai ona faatino ni faataitaiga o le sosola ese ai o tagata tafafao maimoa mai i fafo i se taimi puupuu pe a ono toe tulai mai nei faalavelave faalenatura. Faaalia e nisi sa auai i lenei mafutaga le manaoga e toe foi lava i nuu a tai i luga o le matafaga e fausia ai a latou atinae ona o vaaiga lava nei o loo mafai ai ona faatau atu ai Samoa i atunuu mamao, o se nofoaga aua tafaoga ma malologa.
Ae o le latou talosaga tele ina ia mafai ona fesoasoani atu le Pulega o tagata Tafafao i le fausia lelei o ni nofoaga malu mo lenei atinae. I lenei fonotaga ua iai le maliega e vaavaai i le malosiaga o le la e aoina aua le eletise e faaaoga i ia nofoaga.
Ua vaavaai foi i le taua o le faamuamua e tatau ona ave i mea faufale e le tulai mai ai ni manua ae afaina pe faaleagaina foi nei fale i ni faalavelave faalenatura ma ua faamalosia faataitaiga o le tali atu i nei faalavelave faafuasei.
O le tele o faletalimalo tetele ua vaaia le toe faia o galuega toe faaleleia i le taimi nei ae o le tele o apitaga tu matafaga e lei toe foi lava i tai nisi e toe fausia a latou atinae sei vagana ai le Faofao i Saleapaga lea ua amata vaaia galuega ua faatino e toe fausia ai ia nofoaga.