E ui lava ua mamao ese atu le itulagi ua aumau ai nei se tasi o alo o Samoa ma Niu Sila, sa ta‘uta‘ua foi i le All Blacks, le alii o Mills Muliaina, ae o loo iai lava lona naunautaiga, afai e maua pea lona malosi pe a mae‘a lana konekarate o loo taalo ai nei i Iapani, e toe fia foi mai lava o ia i Niu Sila e faaauau ai lana tautua lakapi.
Fai mai Muliaina, ua ia misia lava le malosi ma le finau e iai le faatinoga o le taaloga lakapi i le Super Rugby e pei ona faagasolo ai foi le Super 15 i le taimi nei.
O loo mafaufau alofa mai le alii taalo i le tulaga faaletonu ua iai lana ‘au sa tautua muamua ai foi, le Blues a Aukilani, ae o loo fiafia i le faalogo mai, o loo matuā lelei le faagasologa o taaloga a le isi ana ‘au, le Chiefs.
Saunoa Muliaina, afai lava ae tei ua tatagi atu se telefoni e moomia ai lana fesoasoani mo le Blues, atonu lava o le a iai se isi toe fesuiaiga o lona mafaufau ma ana fuafuaga, ona e moni lava i seleni ma le manaia foi o lea siomaga o loo aumau ai nei i Iapani, ae lē mafai lava ona aveesea lona loto mai lana lakapi mo lona atunuu o Niu Sila, aemaise lana kalapu sa taalo muamua ai.
O loo iai lava la le faanaunauga o Muliaina, afai ae toe foi mai, e manao lava e toe saili sona avanoa i totonu o le taamilosaga o le Super Rugby, ma e toe manao lava ia faaiu lava lana tautua i lakapi i totonu o Niu Sila.
Ua 31 tausaga o le alii taalo, ma o le Taamilosaga o le Ipu a le Lalolagi i le 2011 lea na atoa foi i ai ma le 100 o ana taaloga faitaulia mo le All Blacks, e pei ona tutusa ai laua ma le alii kapeteni o le All Blacks, Richie McCaw.
Peitai o le taamilosaga foi lena, na lavea ai Muliaina i se manu‘aga i lona tau‘au i le taimi tonu na taalo ai i lana taaloga faitaulai lona 100.
Ae o se faamatalaga a Muliaina i le AFP na lipotia maia lenei tala lata mai le alo o Samoa i Iapani, o lea ua toe sologa lelei lona tau‘au, ma ua toe matala foi le faitotoa mo nisi avanoa e toe fia ofoina atu ia te ia pe a moomia ai.
O le aogā lea o lona taalo ai i Iapani, e pei ua lē o toe soona tu‘i malosi ai lona tino, ma ua matuā lava lelei ai le taimi e malolo ai lona tino ma toe faasauni mo nisi taaloga malolosi e pei ona masani ai i Niu Sila nei.
Na taalo muamua Muliaina mo le Blues ma le Chiefs a o lei sainia lana konekarate mo le 2 tausaga lea o loo iai nei, ma lana kalapu lakapi i Iapani, le NTT Docomo, lea na amata ina ua mae‘a le Ipu o le lalolagi i le tausaga talu ai, 2011.
