Saili se Fautuaga i le Tulafono i se Mea e Tatau ona e Fai i le Amataga, ae aua le Soli le Tulafono ona Saili Mulimuli lea o le Fesoasoani
Ona o le tele o mea oloo sulu mai ai o tatou tagata ua uma ona latou faia mea sa lē tatau ona fai, o lea ua mafua ai lenei fautuaga.
O le fautuaga, e tatau ona saili muamua le fesoasoani mai i le loia, e fautua atu i le tulafono, ma tusi atu i lalo ia fautuaga e tatau ona e vaai i ai, ia e manino i le tulafono, ae e te lei faia ni laasaga e te soliina ai le tulafono.
E totogi le taimi alu o le loia e talanoaina ai lau mataupu ma avatu le fautuaga tusitusia e fai ma taiala i se fesoasoani e manaomia, ae taugofie mamao atu le auala lea i lo le ave o mataupu i le fale faamasino.
Ia manatua e ala ona fai faamasino (Judge) ona o i latou e faalogo i itu e lua (itu tagi ma le itu tetee) i mataupu i luma o le faasinoga, o faamasino, ona fai lea e Faamasino (Judge) le faaiuga.
O le isi mea e nofouta i ai, afai e oo se mataupu i le fale faamasino, e tusa poo le ā le lelei o le loia, e uma ona tuu i luma o le faamasinoga e lau loia la oe faamatalaga ma le tulafono e feagai ma lau faamatalaga na fai i lau loia, e faapena foi ona fai le faamatalaga mai i le isi itu e le latou loia.
Afai o faamasinoga e suesue ai oe pe a uma ona e tauto i le Tusi Paia o le a tautala i le sa‘o, ona tatala lea o le avanoa e fai atu ai fesili a lau loia, suesue oe e le loia a le isi itu, ma suesue oe e le faamasino.
A e pepelo i le suesuega o oe ae maua e le faamasino i suesuega ua e pepelo, o le solitulafonolena e ta‘u o le perjury (pepelo ae ua uma ona e tauto).
E mafai ona molia oe i lou fai o talapepelo ae ua uma ona e tauto. E mafai foi ona molia oe i le solitualfono o le (Perverting the Course of Justice) o le taumafai e faasese le sailiga o le mea sa‘o i le tulafono. E te iu lava i le falepuipui i mea faapenei.
O le totogi o loia e fai faamasinoga, o le totogi mo galuega fai a loia i le talanoaina o lau mataupu ma oe, suesue le tulafono e talafeagai ma lau mataupu, tapena pepa e faila i le fale faamasino, ma tapena lau tali i na tuuaiga mai i le isi itu e faila i le fale faamasino a o lei oo i le taimi o le faamasinoga. E uma loa ona fai ia galuega, tapena le loia mo le faamasinoga.
E le gata i pepa e faila ae o suesuega uma e tatau ona fai e tapena uma nei mea uma a o lei faia le faamasinoga. O galuega nei lea e totogi ai ma tapa e le loia tupe e gaioi ai. E le mafai e le loia ona fai nei galuega e tele, ae leai se tupe e totogi ai galuegafai. E le o le totogi o tupe e faamaonia ai o le a e malo i le faamasinoga. (There is no guarantee that paying the money to a lawyer for a court case is a guaranteed a win)(It is the Judge in Court who makes the decision).
O le Fautuaga ia Totogi se Tupe mo se Advice (Fesoasoani) i le Amataga:
E taugofie mamao le totogi o le tupe mo se fautuaga i le taimi a o lei tupu se faalavelave. Aua le faafiapoto ona tupu lea o le faalavalave, alu i le loia, e le lava tupe e fai ai galuega e tatau ona fai e puipui ai oe. O ni faataitaiga nei i mea e tatau ona e saili muamua ai se fesoasoani:
1. I totonu o fale faigaluega
2. Totonu o Ekalesia
3. Lau aia o oe o le matua i aoga
4. Faatauina o se fale ae lei sainiia ni pepa
5. Mea tau tupe o mokesi
6. Sau tala e te faaleaga ai le igoa o se isi tagata (defamation)
7. Faavaeina o sau kamupani fou
8. Faamalamalamaga o aia tatau i fanau Samoa ma meatotino a aiga.
9. Faavae ma Trusts o Ekalesia.
E lautele mataupu ae lē lava le tatou column lenei e lisi uma atu ai mea ia e tutupu mai. Ona e sili ia te a‘u le avatu o le advice ma tusia i lalo ni vaega o le tulafono e taiala mo oe poo outou, a o lei tupu se faalavelave, o lea ou te fautuaina e sili lava le saili o le fesoasoani i le amataga, e laitiiti le tupe e alu, laitiiti faafitauli e te oo i ai.
E totogi le tupe mo fautuaga ae laitiiti mamao le tupe alu i lo le ave o mataupu i le Court.