Tofā Malielegaoi Taufoli Faasoo & Sulita Vaigalu
(Lepa Aleipata & Lelepa Matautu Savaii)
Sa ma malaga i Samoa (Malielegaoi Faasoo & Sulita Vaigalu) ona toe taliu mai lea o le faigamalaga i le Aso Sa, aso 9 o Ianuari. Ua matuai laki lava ma tatau le taimi na toe foi mai ai. O le Aso Lua o le vaiaso na tea nei, na leai se manatu mamafa i se mea o le a tupu. Peitai ina ua vaaia le suavai ua oo atu i lumafale, o ina na faateia ai loa ma tonu ai loa se manatu e tatau lava ona fai se gaioiga. Na ona luluu lava o pepa aogā ma mea e mafai ona ave ma faaee loa taavale ae agai ese ae o le taimi lea ua amata na oo atu le suavai i o matou vae.
Na o sina taimi puupuu lava na o matou tuua ai le fale ae lilofia uma loa e le vai. Na matou nofonofo mai i le isi itu ma vaai mai ma le faanoanoa i nai a matou mea aogā ua faaleagaina, peitai e leai lava se mea e toe mafai. Maimau pe ana iloa pe toe itula oo atu le vai.
E tele nai a matou meafale e lei leva ona toe faatau faapea le matou fale e lei mamao atu ona toe sosoo atu. Matou te lei o i se mea na matou matamata mai lava i le isi itu mamao seia oo ina matou vaaia si o matou fale ua oo lava ina lilo atu.
O le viiga lava e foi i le Atua ona o mea totino ma fale e toe maua ae faafetai o loo faasaoina o matou ola ma le aiga. O loo matou nonofo nei i le fale o se tasi o le fanau e mamao ese ma le matou fale, ua matuai lē mau manatu lava ona o lenei faalavelave oso faafuasei e aunoa ma ni lapataiga e sauni. Ana matou lē o ese lava matou ina ua vaaia le sua tutu‘i o le vai, semanu lava e tupu se faaletonu.
Ua lē o toe nofoia lo matou fale i le taimi nei, ma ua matou filifili e toe faatau se isi matou fale i se isi nofoaga ae lē o nofoaga na iai lo matou fale lea na lolovaia. O le Aso Toonai aso 15 o Ianuari na faia ai ni galuega o le la‘u i le auala o mea totino ma meafale e ave i le lapisi mamafa auā ua leai se mea o toe aogā e oo lava i le fale ua pala atoa laupapa ma o le fale fogafalelua, ae pei ona tou tagai mai i le ata ua toeitiiti lilo uma le pito i luga o le fogafalelua.
