Tofiga Mataafa
(Lufilufi & Salesatele Falealili & Goodna Brisbane)
O le afiafi o le Aso Lua na matama ai pea la‘u TV ma ou vaai ma le alofa i nai aiga ua faaleagaina a latou mea aogā aemaise lava i latou ua maliliu o latou tagata.
A o matamata la‘u TV sa faafuasei ona tu‘itu‘i atu le faitotoa ae ou sau i ai o leoleo.
E leai ma ni lapataiga i le matou nofoaga. Na faateia a‘u ina ua fai mai leoleo e ave se palanikeke poo se aluga ae agai ese ona o le a sau le lolo.
O le faatonuga lava lea e tasi a leoleo na fai i le matou Street atoa. O nisi loomatutua na ona ave lava o nai palanikeke ma agai ese atu, o nisi foi na tuu lava latou taavale ae o ma le manatu ai e puupuu se taimi.
O a‘u sa ou alu lava i la‘u taavale ma ou moe i le fale o lo‘u cousin. Na oo i le isi po ua ou alu i lo‘u tuagane ma le lilo i so‘u manatu le mea ua tupu.
Na ou toe agai mai e asi ma se‘i avatu ni lavalava, ae peitai o mea masei mea na ou vaaia ua lilofia le fale atoa i le vai.
E mālie foi nei leoleo se‘i faapea mai foi e tapena ma ave ni mea e manaomia e ave pe tatau foi na faailoa mai le tulaga ma le loloto ua latou silafia o le a oo i ai le vai, ae leai ma se ano mai i ni faatonuga e faamamafa mai.
Ai ona ua latou silafia lelei e lē o toe mamao lava le sau a le vai.
Masalo e lei leva na u atu matou tua ae amata loa ona tetele ma maualuga le sua a le vai.
O le tele o mea aogā ua pala uma i le vai, se‘i vaganā ai lo‘u tusifolau na toe faala lava ma toe mago ona sa malu puipuia le mea sa tuu ai.
O le taimi nei o loo o‘u nofo i le isi o‘u tuagane ma lona toalua. Faafetai tele i nai o‘u tuagane ma uso, latou taitoalua ma nai o matou aiga uma faapea uo ua fesoasoani mai ia te au i le taimi nei.
