Opetaia & Rosita Sione
(Pule o le Sumner Park Smash Repair)
O Opetaia ma Rosita Sione o pule sili o le fale lipea taavale, pe toe panel ai foi tino o taavale ma faatau ai taavale ua igoa o le Sumner Park Smash Repair.
O le afiafi o le Aso Lua na valaau mai ai le sui o le Samoa Times poo ā mai si o matou aiga peitai na faailoa atu o loo seki mea uma se‘i vaganā ai le nofoaga o iai le pisinisi ua lilofia uma i le vai. Na taumafai atu ina ia aveese mai computers ma faila faapea pepa uma o le pisinisi, ina ua maua le tala, peitai ua oo le vai i fatafata, o le taimi lea faato‘ā iloaina ai o loo afaina le auala lea, auā e mamao ese ma le matou fale.
Na umi se taimi o matou tutū pea ma matamata a o siisii malosi pea i luga le sua a le vai. O le tele o taavale sa iai i le yard, o taavale uma a tagata o loo auina atu e fai, e pisi lava le matou company i aso uma. Tiga ona tetele timuga ae faasolo lava galuega masani.
Na leai se manatu o le a faafuasei se lolovai i lea vaega, e lei lapataia mai foi i se taimi mamao ina ia nofosauni i ni lolovai se‘i vaganā si taimi puupuu.
E ova atu i le 20 taavale na taeele ai i totonu i le taimi lea na tafe mai ai le vai.
O le vaega lea o le street ma le ogaeleele atoa lea e pito sili ona tele falefaigaluega na lolovaia uma. O le Aso Faraile, aso 14 o Ianuari o le taeao lea na tau matūtū ai le vai ma amata loa ona tapena le nofoaga atoa lenei. Toatele le au fesoasoani sa faamāmāavega i le mafatiaga.
E talitonu o le tele o taavale nei sa vaia uma e tele lava ina inisiua. E ui lava i lea ae faafetaia pea le Atua ua lolovaia ma tele taavale ua lē toe aogā ae o le soifua o le mea pito sili lea ona tāua.
Ua iai le popolega ona o si a matou aufaigaluega i le vaai alofa atu i ai i ni tupe e tausi ai nai o latou aiga, peitai faamoemoe pea i le Atua e maua ai manatu lelei.
