Afioga i le Gafatasi Fuimaono Aukuso & Silipi Setu
(pule o le faleaiga a le Paepaelei – Salani Falealili, Falelima & Sili Savaii)
O le faalavelave ua tulai mai e lei mafaufauina e se tasi, e mamao foi se manatu e ono lolovaia totonu o le taulaga faatau a Goodna ona e fai sina mamao ese ma alavai, le nofoaga e fola ma pae ai le toatele o si o tatou atunuu o Samoa.
O le taeao o le Aso Lua na tatala lava le faleoloa ae o loo mamafa pea tumuga.
Na vili mai le tamā o le aiga (Fiumaono Aukuso ia Silipi) e tapuni ia le fale ae o atu pe tusa lea o le tea o le tasi i le aoauli, ona tapuni loa lea ae alu le maimoaga ina ua maua mai ni faamatalaga ua telele le vai i nisi o nofoaga o Goodna e lē ono oo atu i ai se vai. O se tala sa faateia ai ina ua logo mai ua matuai lolovaia uma le taulaga faatau, matou o atu e fia oo i ai ua matuā leai se mea e toe sao atu ai o se vaaiga matautia tele. O le aso na sosoo ai na toe asia ai peitai ua matuai loloto lava le vai ma ua tapunia lava le auala.
O le agaga faafetai i le Atua auā e leai se isi na faaletonu se soifua e ui ua faatamaia uma mea aogā, o faleoloa lavalava ma supamaketi i totonu na leai se mea na toe sao mai, e oo foi ia matou ogaumu ma le tele o mea aogā sa masani ona teu i totonu o le fale‘aiga ma nisi o oloa ua leai se mea o totoe.
E leiloa se taimi e toe foi ai i se tulaga lelei lenei taulaga faatau, ae faafetai lava mo le avanoa.
