E faigata ona faamalamalama tagata i auaunaga faalauiloa

Ua tele faitioga ua faia faasaga i le ata faalauiloa o le kofe o le CCK – o le taumafaiga a lea kamupani e faalauiloa lana oloa oloo totō i Samoa. Na amata mai lava i le tausaga na tea nei le faatinoga o nei faalauiloa. O se tala o loo afifi mai ai le oloa lenei o le kofe a le CCK ma e pei lava ona silafia, e amata mai lava i le feiloaiga a le alii o “Mika” ma le tamaitai o “Mele”.

Faasolo mai le isi vaega ua agai i se taumafataga o le afiafi, o se faiga ua vaaia i soo se faigauo i nei vaitaimi. Mae‘a lea ua oo le alii i le aiga o le tamaitai ma iu ai lava ina taumafai le alii lenei e ta‘u atu i le tamaitai lona manaoga ae na umi se taimi faato‘ā mafai ona masua atu i sana faamalamalamaga lona manaoga e faaipoipo i le tamaitai o Mele.

O aga ua masani ai le toatele i mea nei o faigauo ma ua soifua ai foi le toatele. Ta‘ua e le tamaitai na pueina ma tuufaatasia lenei ata faalauiloa i ona vaega uma nei, o le faaaogā o se tala e afifi mai ai se tasi o le tele o metotia e faaaogā i le faatinoga o faalauiloa. Ae na amata lava ona ia faalogo i le tele o faitioga.

E toe lua vaega o le ata faalauiloa lenei e lei faailoaina ma o le vaiaso lenei na talanoa ai lenei tamaitai ma le pulega o le CCK i le faaauau ai o le latou faalauiloa.

O le faamatalaga a le tamaitai pule o le CCK o Georgina Newton ua matuā tele lava le fesoasoani o lenei faalauiloa i le faatauina o le oloa lenei a le CCK o lana kofe, ma o le auga lava lea ma le autu o le faia o nei galuega faalauiloa e maketi ma faatau atu ai oloa eseese.

O se suiga foi i faalauiloa masani o le faaali mai lava o le kofe ae a iai se isi auala e agai i ai le faatinoga o faalauiloa ona iloa lea o le tele o le mafaufauga oloo alu i galuega nei auā le faamalieina o le tagata matamata i mea nei o televise. O se auala foi ua faaaogā ai le tomai i ata faalauiloa ua vaaia i totonu o le atunuu.

O le leitio Polenisia na agai i ai le lē fiafia o le tamaitai na tuufaatasia lenei ata faalauiloa ona o le manatu o Ronette sa tatau lava ona saoloto le faaaliga o finagalo o le atunuu ae o le faaopoopo atu o Sumeo ma sui o le polokalame o le ualesi mosooi e faatatau i le ata ma faitioina ai le tuufaatasiga o le ata faalauiloa, na lagona ai lava le faanoanoa ona o le tulaga e tatau ona iai galuega tau faasalalau, e le faaali fua finagalo o tagata faigaluega o le leitio i manatu faaalia o le atunuu.

O lea na talanoa ai loa le tamaitai fai ata faasalalau i le tamaitai e pule a le CCK e faatatau i lea faafitauli aemaise ai o le CCK le isi kamupani oloo totogi ai faasalalauga lenei o le kofe a le CCK ma taofi mai ai loa le faaali o finagalo o le aufaasalalau faatatau i lenei ata faalauiloa.

E tulai mai faitioga lenei ae o le isi foi itu i le toatele o tagata ua faapea ona lafo atu a latou talosaga e pue atoa atu le faasologa o ata faalauiloa lenei mo i latou – e tupu i aso uma.

Talu foi faitioga ua toatele lava ua fesootai i lea ofisa ma faaali i ai le faamalo i le ese foi o le auala ua faatau ai le kofe aemaise o le taumafaiga ina ia sui auala e faatau ai ia oloa o loo maua i Samoa.

O le faitioga tele lava o le manatu o nisi o le atunuu ua tautalaiti ai le tupulaga i nei ituaiga ata faalauiloa. E manatua ai le faasalalauga o le sukalati o le Morro lea foi na faalauiloa i tausaga ua tuanai i luga o televise a le atunuu ma e manatua o le ata o le tamaitai na alu ane ma le ofu taele i luga o se vai taele oloo taoto ai se alii i autafa ma faala.

O le ata lea e tasi e manino ai fautuaga o se feiloaiga matautia o le a faia i le va o lea tamaitai e savali atu i le alii lenei ae o loo taoto – faapea poo le ā lava le taunuuga ae taunuu atu le tamaitai, se‘i ane le oloa lea e i le lima o le sukalati ona foliga mai lea e taufao ai i luga o le vai ae ua lava lava le savali atu ua ese ai foi le manatu o le toatele ma na faaali ai foi faitioga.

E iai foi i le vaitaimi o le Telecom New Zealand i Niu Sila i le faato‘ā amataga o ana foi faalauiloa na sau ai le ata o manu o le toafa e lua ma e na o le pese lauiloa lava o le vaitau o le Beach Boys o le 1960 na ta ae onoono ane i luga ulu o manu nei – ae o le faalauiloa o fesootaiga o le telefoni feaveai faato‘ā tau faatau i tagata o Niu Sila – na toatele foi na fesiligia i lea atunuu le fesootaiga o manu e lua o le toafa o loo autilo mai le isi i le isi ae uma ane o le telefoni feaveai – a fesiligia e le mafaufau ma tau matemate – o se tasi lea o auala ua tele ina faaaogā e le au fai ata faalauiloa ina ia unai ai se oloa.

O le fesiligia o fesootaiga nei – ma ua vaaia le tele o ata faalauiloa faapea i atunuu i fafo ua tele ina faaaogā ai mafaufauga faapea. O le tāua o le fesili o tagata ma faatau le oloa ma a ausia lea tulaga e pei ona faaalia e sui o le CCK ma le Promo Pictures, na o latou tuufaatasia lenei ata o le CCK ona mautinoa lea ua ausia le auaunaga sa tatau ona faatino.