O le upu a le Tusi Paia o le taimi ma le mea e tupu ai. E pei o le mau a Samoa, “O le fuata ma lona lou”. E faapea foi tala a tagata pe a oo ina felafolafoai i manatu ma lagona, o le aso e faanoanoa ai, ma le aso e fiafia ai, e pei foi o le tala a Poto, o le taimi e lulu ai, ma le taimi e selesele ai.
O nei mau fuaitau uma e fesootai ma le soifua tuputpu ae o le tagata aemaise ai le ola finafinau ini matatia o loo tulimatai, aua e pei lava o le upu o loo faaulutala ai lenei tusitusiga. “E faigata i le faafailele, ae suamalie pe a fua mai”.
A oo la ina fua mai, ona toe pine lea o le tala a le Tusi Paia, “O le faamoemoe ua taunuu, o le laau o le soifua lea”
O le ola saili ma le finau i mea lelei e le ose fatu e toto nei ae fua mai taeao. O le mea mautinoa lava, e pei lava o le vaa e fau i le ao toe fau i le po.
O lagona na sa lofia ai le tamaitai o Anamua Lole Peo ao folau lona sa i le vasa o aoaoga, aua o ia o le tuamafa sa fili i malae ma faalele aua se manuia o le aiga. Lea ua foi mai, ua foi mai ma le manuia, ina ua faaiuina lana taumafai i le Iunivesite o Aukilani, i le faailoga o le Master of Education Leadership e pei ona sa faauuina ai i le vaiaso na tea atu nei.
E ui ina o le faiva sa ia tala upega toatasi ai, ae sa tapuaia e nai ona matua ma uso ma tuagane, aemaise o aiga, aua o faailoga faapenei e pei ona ia ausia, e leai ma se eseesega ma le lupe o le pupula lona mauagata.
O Anamua Lole Peo sa faamanuiaina lana taumafai i le Iunivesite o Aukilani i le faailoga o le Diploma of Education, na maea ona sosoo ai lea ma le Bachelor of Education, ae i nai tausaga ua tuanai atu, ao lea ua maea lana Master of Education Leadership.
Sa faaalia le agaga faafetai a nai ona matua, le susuga Papaliitele Solomona Peo ma le faletua ia Maria i le Atua ona o Ana faamanuiaga ua ae ai ma le manuia le faatautaiga a si a la tama.
Sa faapea foi ona faafetaia e le tamaitai o Anamua le galuega fita o nai ona matua e ala lea i le nofotatalo ao ia feagai ai ma aoga, ae faapea foi le tapuaiga a nai ona uso ma tuagane ma aiga. Na ia taua, o le viiga lava e foi i le Atua, aua o Ia na mafua ai ona ia ausia lenei faailoga.
O le aso ananafi sa faia ai se toonai tele a le aiga e saga patipatia ai le alofa o le Atua, ma o le susuga Papaliitele Lafulafu Peo sa fai ma sui o le aiga e saga faafetaia le faamoemoe o le tamaitai o Anamua e tusa ai ma lana taumafaiga ua faaeaina.
Na maea le faafetai ona fono faapipii lea o le susuga i le Aoao ia Tavita Peo, ae taualuga e le susuga Alaoa e tusa ai ma lona foi agaga fiafia e pei ona sa faailoa i le aso.
Na maea ona tauaaoina lea ose meaalofa sa tapenaina e faatino ai le agaga faafetai ona o le loto tausinio o le tamaitai o Anamua, ona taualuga lea i le toonai sa tapenaina e ona aiga ma saga fiafia atili ai, se ia oo ina taape le fuamanusina ma po ai le aso o le agaga faafetai i le Atua.
