“E Faavavau Aiga”

Faatasiga a le fanau a Vito & Leitu Pa’u F.K.

E ui lava i le vava mamao o atunuu ua aumau ma alala ai nei i latou uma na tupuga mai mātua ia Vito & Leitu Pa’u F.K., ae na a’e lava se tofā ia i latou o loo faamatua i lenei auaiga toatele, ina ia faatulaga se aso e toe potopoto ma faatasia uma ai alo uma ma i latou na tupuga mai nei mātua.  O le Aso Sa, 17 o Iuni 2018, na faataunuu ai loa lenei faamoemoe, ina ua toe faatasitasi uma fanau, o a latou fanau, ma isi uma fanau na tupuga mai ia Vito & Leitu Pa’u F.K.

E eseese uma atunuu na auai mai o latou sui i lenei faatasiga; o nisi na malaga mamao mai Falani, Hong Kong, USA, Ausetalia, Niu Sila, ma i latou o loo nonofo pea i Samoa.

O se vaaiga matagofie ma maligi ai loimata o le fiafia, a’o feiloai ma feofoofoai moomooga alofa o sui eseese o le auaiga, ina ua faasolosolo ona taunuu atu i Samoa e sauni ai mo lo latou faamoemoe. Na amata lava le faatasiga a le aiga i le Misasa i le malumalu o le Ekalesia Katoliko i Moamoa, lea na faatino e le afioga ia Father Petelo Vito Pa’u, o se tasi lava o lupe faalele a le aiga i le galuega a le Atua, sosoo ai ma le faamanatuina o le aso soifua o le latou tuaa ia Vito Pa’u sa faia lava i lo latou maota i Moamoa. Ina ua mae’a lea ona agai lea o le aiga atoa i le nofoaga a le St Theresa i Leauvaa ma nonofo ai iina mo aso e fā, o ni aso sili ia ona maua ai e sui taitasi o le aiga avanoa e faifai mea faatasi ma faatino nisi o a latou faafiafiaga, ma faasolo atu ai le aiga i le isi vaega o le latou mafutaga i Savaii, ma nonofo ai i nofoaga o tafaoga i le Tanu Beach Fales.

O se tasi lena o afiafi o le a lē galo i le aiga, ina ua fai foi le faafiafiaga a le Tanu Beach Fales i le afiafi e pei o a latou tu masani mo a latou malo asiasi, ae saasaa tagata uma o le auaiga o Vito & Leitu i pesega faasamoa ma suifefiloi.

E to’a 10 alo ma fanau na tupuga mai ia Vito ma Leitu, ae toe to’a 8 o loo soifua mai pea i le taimi nei. E 31 fanau a fanau poo grandchildren, 52 great grandchildren ma le to’a 3 o great great grandchildren.

O le fu’a tauave a lenei auaiga, “E Faavavau Aiga!” (Vito aiga is forever).

Faamatalaga na tuuina mai.