Ioane 6:1-14
O se taimi mafatia, e fai o le mafutaga ua motusia ma le tina, ae o le lima vaivai i lena taimi, lē iloa pe faapefea na fuafua tapenaga o le toe momoliina o si o‘u tina i Samoa i le tamā o loo faatali mai.
Ua vevesi le mafaufau, fefiloi faatasi le tagi faanoanoa ma le tagi popole, poo fea e aumai ai se fesoasoani mo le tapenaga o lenei malaga. Fai o pasese mo Samoa, a o le sauniga foi o si o‘u tina mo le malaga i le vaalele ma tulaga masani o maliu, e lē faigofie.
A taunuu foi i Samoa, tafefe, ai seiloga e fai e le Atua se vavega, ona mautinoa lea ua faamalieina mea uma o loo manaomia mo le aso o si o‘u tina.
E te malamalama i lagona sa oo i ai, auā e iai foi taimi sa utia ai oe i faafitauli, ua lē iloa poo fea a tua i ai. Ua tagi ma maligiligi loimata, ua nutimomoia le fatu, ma le polepole vale ua lofia ai lagona, ma iu ai ina lē manogi se taumafa.
Ai e faapea lagona sa oo ia Filipo ina ua fetalai atu Iesu ia te ia, “O ifea tatou te faatauina mai ai ni areto, ina ia aai ai latou nei?”
Ua atuatuvale i le toatele, pe ā ma le lima afe tane ae lē faitaulia fafine ma tamaiti. O le taimi foi ua pogipogi, ae leai ni faleoloa. Afai foi e iai, e lē lava ni tupe.
O le nofoaga e faalaulautoafa e pei o le molimau a Luka, e leai se mea e mafai na fai i le manaoga o le Alii lea ua folasia, ia avane ni meaai mo tagata.
Ua alu solo le mafaufau o Filipo, ua faavasega tupe ia e iai, na o le lua selau tenari, ua fai atu ia Iesu, e lē lava.
E faapea uma lava tatou. E iai loa ni faafitauli e tutupu faafuasei, ua alu solo manatu. Ua tilotilo i lo tatou vaivai ma le lē tagolima. Ua manatu popole, ae matuā galo lava o lea e iai le Alii faivavega ma tatou.
I le fuaiupu e ono, o loo faapea sa tofotofo e Iesu Filipo. O le natura o le Atua, na te aumai faigata e tofotofo ai tatou ina ia faatupu ai lo tatou faatuatua. O mea faigata mo lo tatou lelei. E finagalo le Atua e aua tatou te faatuatua i mea tatou te maua poo mea tatou te mafaia, ae ia faatuatua iai te ia, tele pe iti, faatuatua pea.
Ia manatua, ia taunapa i le Atua i soo se taimi o la tatou savaliga. Pei o le upu a le Poto, ‘Ia manatua o ia i ou ala uma; ona faatonu ai lea e ia lava ou ala.’
Ua te‘i Filipo i le valaau ane o Aniterea, o loo iai le tamaitiiti e iai si ana tāuga o areto e lima ma i‘a iti e lua. Ae toe sosoo mai ai le isi tala a Aneterea, “a e aumā ea ia mea ia i latou e toatele?” O le manatu foi o Aneterea, e lē lava. E toatele le motu o tagata, e lē taitai gafatia e nai taumafa ua maua ona fafaga uma latou.
Ae faafetai e ui ina itiiti, ae ua avane mo le manaoga o le Alii. Ou te talitonu, e iai isi sa o ane foi ma nai afīfī mo le aoāuli, ae pau lea o le tamaitiiti ua tuu ane ma le loto fiafia. E ui e faatauvaa, ae sa fai ai e Iesu le vavega.
E iai taimi tatou te manatu māmā ai i nai mea magumagu i o tatou lima, ailoga e lava ai se ā? Ailoga e taulia. Pe faapea, ou te vaivai, ou te lē iloa nanu. Ou te lē mafaia se mea.
E vaivai lo‘u aiga. Pe tatou te matamuli ona o se mea ua mafai, ma momoo, a tele ni tupe, ua e foai mo le Atua ma lana galuega. Ou te tautino atu, a faamaoni e foai i nai mea iti ua maua i le taimi nei, e oo ane ina maua ni mea se tele, ua e masani i le foai, ae amata i mea iti.
Poo le ā lava se mea itiiti ma le faatauvaa ia te oe, afai e te tuuina ia Iesu, e fai ai e Iesu se vavega mo lou manuia, ma le lelei o nisi e toatele.
E tutupu mea e avea, e faateleina lau seleselega pe a faamaoni i nai mea iti ua aumai e le Atua i ou lima. Se taleni, se tomai poo se agavaa, toe faafoi e viia ai le Atua. Ae a saili ai sou viiga, e toe aveesea. Auā o mea uma ua foaiina i le tagata, o nisi o ana vavega mo tatou.
Poo ā lava ni faamanuiaga ua faamanuia ai oe e le Atua, o lana pule fai toatasi lena e faasoasoa mai ai mo le tagata. Ae o lo tatou tiute, ia faamaoni ma le loto maualalo, auā o le Atua e ana mea uma, na te liliuina mea faatuvaa e fai ma mea matautia.
E sauni le matou malaga mo Samoa e molimoli le tino maliu o si o matou tina, ua amata na vaai o matou mata i le alofa faamaligi o le Atua. Sa faaaogā e le Atua uo ma aiga, o nisi foi auala e lei mafaufauina, sa ala mai ai ona manuia mo matou. Ua tali le Atua i tatalo sa faia ma loimata.
O le Luitau, aua ne‘i galo ona faataga Iesu e iai i lau tapenaga. Poo ā faafitauli, pe itiiti foi ni mea ua maua, e fai ai lava e le Atua vavega. Soifua.
