O le Aso Lua o le vaiaso ua tea na tatala aloaia ai le fonotaga a le Palemene a Niu Sila mo le tausaga 2011, ma na amatalia lea fonotaga i le saunoaga autu a le Palemia a Niu Sila.
A o saunoa le Palemia, ua ou fiu e faalogologo pe na te afea se mataupu faapitoa mo tagata atumotu o le
Pasefika, peitai ane e leai. Ou toe faitau foi i laupepa e 20 o lana lauga, e matuā leai lava se fuaiupu e tasi e ta‘ua ai tagata Pasefika.
E lē o ta‘ua ai le sao o tagata Pasefika, e leai foi se faiga faavae faapitoa e fesoasoani ai i aiga Pasefika.
Na o le lua lava mataupu i lona tulaga aoao tetele o loo ave i ai le faamuamua a le Palemia ma lana faigamalo.
Muamua, o le a fausia le faavae malosi mo le siisiitia o le tamaoaiga a Niu Sila, ma lona lua, o le a taumafai e toe faatulagaina auaunaga a matagaluega a le Malo.
O le fuafuaga ua faataoto mai e le faigamalo mo le fausiaina o se faavae malosi mo le siisiitia o le tamaoaiga a Niu Sila, ua faapea mai o le a faatau ese sea a kamupani o moli eletise a le Malo.
O lona uiga ua manao e faatau ese aseta a le Malo ia i latou o loo tele tupe. A o le faaupuga o loo faaaogā mai e le Palemia e faapea, ia maua ai le avanoa e tamā ma tina (mums and dads) e inivesi ai latou tupe ma avea latou ma tagata e pulea ia kamupani.
O le fesili, e toafia tina ma tamā Samoa e mafai ona faatau ni o latou sea i ia kamupani? Pau lava tagata o le a mafai ona inivesi latou tupe ma faatau sea o ia kamupani na o latou e tele tupe maua.
O lona uiga na o tagata maumea ma i latou e tele tupe e mafai ona faatau ni sea i ia kamupani. E faatauese loa ia kamupani a le Malo, e lē toe maua e se Malo ni polofiti mai ia kamupani.
E lē gata i lea o le a pule lava latou e umia sea o ia kamupani ma le tau e faatau ai le moli i aiga taitasi. Silasila i le faaletonu o lenei fuafuaga.
O le isi fuafuaga ua iai mo le fausiaina o se faavae malosi mo le siisiitia o le tamaoaiga a Niu Sila, ua faapea mai le Malo o le a unai tagata lautele ina ia teu latou tupe.
E toafia tagata faigaluega o Niu Sila o loo lelei totogi e mafai ai ona fai ni teugatupe? Afai foi tatou te fesili i lo tatou aiga, e toafia ni aiga Samoa o loo lelei tupe maua e mafai ai ona fai ni teugatupe?
O le tali, e toalaiti lava tagata e mafai ona faataunuu ni teugatupe.
Ona o le taugata o le soifuaga ua iai nei, e mafua mai i le siitia o le GST, siitaga o le tau o mea taumafa, penisini taavale, pili o le moli eletise, ma pili o aoga a le fanau, e toalaiti lava tagata o loo mafai ona fai ni teugatupe.
E lē gata i lea, o le totogi faatulaga faaletulafono pito i sili ona maualalo poo le minimum wage, na o le 25 sene le aofai ua sii ai nei e le Malo mai le $12.75 agai i le $13 i le itula.
Ona ou fesili lea iai i le Malo pe toafia i latou e mafai ona tausi o latou aiga pe afai e totogi i le $13 i le itula. E leai lava ma se isi na tali mai.
O‘u toe fesili foi i le Palemia, pe mafai ona tausi lona aiga pe ana faapea e totogi ia i le $13 i le itula. E leai lava ma se tali.
O le vaega lona lua ua ave i ai le faamuamua a le Malo, o le toe faatulagaina lea o auaunaga a matagaluega a le Malo. O le uiga o lenei fuafuaga a le Malo, o le a faatea nisi o le aufaigaluega a le Malo.
Silasila, na faia e John Key ma lana vaega le faaupuga ina ua avea latou ma faigamalo e faapea, o le a faapulou pe faatapulaa le aofai o tagata faigaluega a le Malo, ae lē toesea ni tagata faigaluega.
(We will ‘cap’ public servant numbers but we won’t cut them). O lea ua manino mai lipoti a le Malo, ua silia ma le 2000 le aufaigaluega a le Malo na vaea mai a latou galuega i le
tausaga 2009 agai i le 2010.
Ou te talitonu e toatele ni tagata Pasefika o loo faigaluega nei mo matagaluega a le Malo o le a faatea, pe vaea mai a latou galuega talu ai fuafuaga ia a le Malo.
Ia te au ma la‘u vaai i le tulaga o le a iai nei le faaletonu o le tamaoaiga a Niu Sila, e lē o tutusa fuafuaga ma faavae faataatia a le Malo a le National, ma le ituaiga fesoasoani o loo manaomia e tagata lautele.
O loo manaomia e tagata Niu Sila se faamāmā avega mai le taugata ua iai nei le soifuaga.
O loo manaomia ni galuega e lelei totogi. O loo manaomia le fesoasoani auā a‘oa‘oga a fanau. O loo manaomia ia faamuamua tagata lautele, i lo le faamuamua o le aufaipisinisi tetele.
Ua tatau ona tatou sauni lelei, e tele faafitauli e ono tulai mai i o tatou aiga talu ai faiga faavae a le Malo.
