O tausaga taitasi e tatau ai i soo se faigamalo ona fofola mo le silafia o le Atunuu atoa le Tala o le Tupe Faaletausaga. O lea lipoti e ao i soo se faigamalo ona faamatala auiliili mai ai pe fia le tupe o le a faaaogā mo le faatupeina o ana auaunaga ma galuega faatino, ae o fea tonu foi o le a maua mai ai le tupe e faaaogā mo ia galuega ma auaunaga.
E aupito i sili ona tāua tupe faaalu a le Malo i ana galuega ma auaunaga i le matagaluega o le soifua maloloina, aoga, fale, ma le matagaluega o le WINZ mo tagata lautele. E mafua ona tāua ia matagaluega ona o auaunaga ia e manaomia mo tagata uma i le faagasologa o le olaga.
Pe mativa pe mauoa, e iai lava le taimi e manaomia ai le fesoasoani a fomai ma le falemai, mo togafitiga ma talagavai. O se tasi lea o aia tatau o le maua o le fesoasoani i soo se taimi mo le puipuiga o lou soifua maloloina.
O le mafuaaga lea na faavae ai matagaluega o le soifua maloloina ina ia maua e soo se tagata le avanoa i le falemai, fomai, ma togafitiga mai ma‘i o le tino ma le puipuiga o le soifua maloloina.
O le mafuaaga lea e tāua ai pe fia se vaega tupe e faaalu e le faigamalo i tausaga taitasi i le matagaluega o le soifua maloloina auā le manuia o le atunuu lautele.
E ui i lea, o latou e mauoa pe tele a latou tupe, e lē faamoemoe i falemai a le Malo. Talu ai e tele latou alagatupe o loo mafai e latou ona faaaogā falemai ua ta‘ua o ‘private hospital’ poo falemai nei e totogi e le tagata lava ia. O nei falemai e pulea e kamupani ma le aufaipisinisi.
E lē soona alu i ai se isi se‘i vaganā e tele au tupe poo le iai o lau inisiua e totogiina le togafitiga o oe lava ia.
O nei falemai e faamoemoe tasi lava i le au mauoa ma latou e tele tupe maua. Talu ai e lē agavaa uma le toatele o tagata i falemai nei o ‘private hospital’ e faamoemoe tasi lava le atunuu lautele i le matagaluega o le soifua maloloina e faatupeina e le Malo.
O fea e aumai ai e le Malo le tupe mo le faatupeina o lea matagaluega? E aumai lafoga e ao mai tagata faigaluega, ma lafoga e ao mai le aufaipisinisi. O nisi o taimi ua fai nonogatupe a le Malo mo le faatupeina o lea auaunaga, ae faamoemoe tasi lava i lafoga e ao mai le aufaigaluega ma le aufaipisinisi.
O lona uiga, o soo se taimi lava e faaletonu ai lafoga e ao mai e le Malo mai le aufaigaluega ma le aufaipisinisi, e faapena foi ona faaletonu le tala o le tupe e faaavanoa mo le faatupeina o le matagaluega o le soifua maloloina. Afai e faaletonu le faatupeina o lea matagaluega o lona uiga ua faaletonu foi le auaunaga e maua e tagata lautele.
E faapena foi le matagaluega o aoga. O se tasi nei o aiā tatau mo le fanau. E ao e le malo lafoga mai le aufaigaluega ma le aufaipisinisi ina ia mafai ona faatupeina ai le matagaluega o aoga ina ia maua uma e alo ma fanau le avanoa e aooga ai.
O latou e tele a latou tupe maua, poo le aumauoa, o latou nei e faaaogā aoga ua ta‘ua o ‘private school’ poo aoga o loo faagaioi faapisinisi.
E le taugofie foi pili o nei aoga. O le mafuaaga lea e lē agavaa uma i ai tamaiti aoga, se‘i vaganā lava tamaiti e tele tupe a latou mātua.
A o le toatele lava o le atunuu e faamoemoe i le faigamalo e ao mai lafoga mai le aufaigaluega ma le aufaipisinisi e faatupeina ai le totogiina o aoga ma faiaoga. E faapena foi le matagaluega o fale. O le aiā tatau le iai o fale mo aiga.
O le mafuaaga lea ua faavae ai lea matagaluega ina ia fesoasoani i soo se aiga e leai se fale. O le masani lava sa iai ia fesoasoani le Malo ia oe ma lou aiga i se fale taugofie, seia oo ina e tumalosi lava oe ua mafai ona faatau la oe lava fale.
E faatupe foi lea matagaluega mai lafoga totogi a le aufaigaluega ma lafoga totogi mai le aufaipisinisi. Afai foi e faaletonu tupe e faaavanoa e le Malo mo lea matagaluega, e faaletonu foi le auaunaga o lea matagaluega ma aafia ai foi le aofai o fale e avanoa mo aiga lautele.
I aiga lava e tele tupe ma lelei le faasoasoa, o aiga na e mafai lava e latou ona faatau o latou fale, poo le faigofie ona maua o fale mai le aufaipisinisi e nofo totogi ai.
O le matagaluega lea o le WINZ, na faavae lava e fesoasoani i aiga e manaomia le fesoasoani mo sina vaitaimi i le taimi na faaletonu ai galuega i Niu Sila, ma ua faaauau ai pea lea fesoasoani. E fesoasoani foi lea matagaluega ia i latou ua maua i ma‘i o le tino ua lē mafai ai ona faigaluega. E fesoasoani foi i aiga ua sola le tamaloa, poo ua tia‘i e le tamaloa le toalua ma le fanau. O le autū tonu lea o lea matagaluega ia fesoasoani ia i latou o loo manaomia le fesoasoani mo sina vaitaimi.
E faatupe uma nei matagaluega i lafoga mai le aufaigaluega ma le aufaipisinisi. O soo se taimi lava e faapa‘ū ai lafoga a le aufaigaluega, poo lafoga a le aufaipisinisi e faapea ona aafia tupe e faaavanoa mo le faatupeina o nei matagaluega.
O lafoga na totogi e le aufaipisinisi na pa‘ū mai le 33% sa iai i le 2008 i le 30% i le tausaga 2009 seia oo i le 2011, ma ua toe faapa‘ū foi e le Malo i le 28% mai le 2012.
O loo tumau pea lafoga a le aufaigaluega i le 30% e totogi pe afai o lou totogi e i le va o le $48,00 agai i le $70,000 i le tausaga, ma le 33% pe afai o lou totogi e silia ma le $70,000 i le tausaga.
Talu ai le faapa‘ū o lafoga a le aufaipisinisi, ua faaletonu ai auaunaga i matagaluega ua ou ta‘ua. O le fesili afai e te manao e faaauau auaunaga a ia matagaluega e tatau ona sii i luga lafoga totogi. Afai e leai, ia faamoemoe o oe o se tagata e mauoa.
