Faatalofa atu i le paia lasilasi o le aufaitau a le tatou nusipepa. Ona o ni suiga ma ni avanoa ua maua, o lea ua ou faaauauina ai le tautua a le susuga i le faafeagaiga ia Peter Leota, ona ua tele ona tuatuagia.
O lo‘u igoa o Opeta Tautalafua ma si o‘u toalua o Faalupea, ma e toaono si a ma fanau, tasi le tama ma teine e toalima. O loo matou nonofo i Sini Ausetalia, ma te faifeau i le Ekalesia e faaigoaina o le Faith City, i lalo o le faamalu a le AOG Church of Samoa.
O se isi taimi o lenei polokalame, o le a auauai atu ai otootoga o se tautinoga i le matagofie o le Atua i le suiga o lo‘u olaga talavou, seia oo mai i lenei vaitau. Ae tatou fetaiai pea ia i luga o tusitusiga, o le tatalo ia maua so tatou ‘ai e ala i lenei auaunaga faatauvaa.
O lenei la polokalame, ua suia mai le Taiala i le LU‘ITAU. O se ulutala e tāua ia te au, ona o se upu sa faaaogā soo e le tamā faaleagaga sa fesoasoani tele i lo‘u olaga talavou, le susuga ia Ene Sagala ua fai i lagi lana folauga. O le faaperetania; ‘CHALLENGE’ lea ua faaigoaina ai lenei polokalame, o le “LU‘ITAU”. Ae alo maia.
E faapea na maua le ola fiafia?
Mataio 6:34, “O lenei, aua tou te popole i le aso a taeao; aua e popole le aso a taeao i ana lava mea.”
O le tele o taimi tatou te o ai i ni faleola e pei o le faleaiga o le McDonald, e tele ina fai mai le aufaigaluega, ‘ia manuia le aso.’ I le gagana a papalagi, “Have a nice day”.
E masani foi ona faapea mai a‘u uo poo nisi o aiga i lea lava faaupuga, ia manuia le aso. Peitai, e lē avea le fai o ia faaupuga e faamaonia ai o le a e maua se aso manuia, poo se aso fiafia.
O le tele o tagata soifua, e naunau ia ola fiafia ma soifua i se soifuaga manuia. Auā o ai e fia ola faanoanoa? O ai foi se tagata e fiafia i se olaga e puapuagatia?
O le ala lea ua saili solo ai tagata, e oo lava ina tagofia ai fualaau faasāina, poo ava malolosi ma nisi o mea faafiafia o le olaga lenei, ina ia maua lava se ola fiafia.
E iai foi le auala ua aumai e le Atua e maua ai e le tagata le fiafia, ma o nisi la nei o laasaga e tatau ona faataitai i ai ma maua ai le soifua manuia ma le fiafia.
• Amata lou aso i se mafutaga ma Iesu i se tatalo ma le mafuta i le Tusi Paia. O le amataga o se mea e tāua tele. A fia manuia fanau, ia amata i se aoga lelei ma se aiga lelei. O le amata foi o lou aso faatasi ma Iesu, e lē taumateina e manuia.
O nisi e amata o latou aso i ni faamalositino, e lelei lea mo le tino maloloina, ae lē faapea o le a maua ai se aso manuia.
Ae a amata faatasi ma Iesu, e fesoasoani mai ai Iesu i ni faafitauli o le a feagai ma oe, ma e maua pea le toafimalie i totonu o ni faafitauli e alia‘e mai i lou aso.
• Faaeteete i upu e tautala ai. O le tautala e aafia ai se vaega tele o lou aso. O lona uiga, e tele ni upu e te tautala ai, ma o ia upu o loo iai se malosiaga. E faamalosia ai oe atoa ma nisi e faalogologo ia te oe.
O upu foi e iloa ai le ituaiga tagata e iai lou tagata, poo se tagata lelei, leaga, faamaualuga, pe loto lelei foi. E tāua tele le pulea o talanoaga, ma ia mafaufau muamua a o lei lafoina ni upu, auā o upu e faamasinoina ai i tatou. Poo ni upu e viia ai le Atua, poo ni upu e faatupu ai ni vevesi.
• Manatunatu ma mafaufau i ni manatu lelei. O le soifuaga lava ia o le tagata, e tutupu manatunatuga i o tatou loto. Peitai ua faatonu mai le Tusi Paia, ia pulea lelei o tatou manatunatuga uma e pei o le augani a le aposetolo i le Ekalesia i Filipi 4:8, “Le au uso e, o le toe upu lenei; o mea uma ua moni, o mea uma ua tauleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foi o se isi amio lelei, poo se tasi mea e viia, ia outou manatunatu i ia lava mea.”
• Ia tausisi i le faaleleia o mafutaga ma nisi tagata ua malepelepe, ia fefaamagaloai i le fealofani ma le fetausiai.
O nisi nei o auala e tupu ai pea le fiafia ma maua atili ai le filemu i lou loto. Ia manatua, e lē mafai ona tatou sosola ese ma le mafuta pea ma tagata. Poo tagata o aiga, ekalesia poo galuega, ua uma lava ona polokalame e le Atua tatou, ia aumau ma nonofo ma isi uso a tagata, ma e lē mafai ona tatou ‘alo ese ma ai.
Ae e iai foi nisi mafutaga e tatau ona faamutaina, pe matuā motusia lava. E pei o ni faiga uo e aafia ai lou aiga, ma faaletonu ai lou ola agai i luma.
Afai tatou te tausisi i nei taiala faigofie, e lē taumate tatou te maua se soifuaga fiafia ma le manuia.
Ia faamanuia tele le Atua i lau faitau, ia faamalosia e le Atua lou loto faatuatua e ala i lenei polokalame.
Soifua
