Sosaiete Fesoasoani Matagaluega SISDAC QLD: Photo - Setiu Iakopo Tofilau

Sosaiete Fesoasoani Matagaluega SISDAC QLD: Photo – Setiu Iakopo Tofilau

E mauaa ma tumau le faatuatua o le tagata e latalata i le Atua i le tatalo aemaise le ola saili i Afioga mamana a le Atua, a’o faia le taufetuliga e tuli ai se ‘ai o le tagata lava ia mo le aai ua mae’a ona folafolaina mai. O le galue e leai se faalogologo tiga, faamalosia loto i le auaunaga i le Alii, o se oliolisaga i le faamoemoe lea e afua ai le onosai i puapuaga, finafinau ma pulunaunau i talosaga. O le mau tauave lea na faamamafaina, “Aua le faavaivai i le filiga, ia malosi le loto. Ia auauna i le Alii. Ia olioli i le faamoemoe, ia onosai i le puapuaga, ia finafinau i le tatalo.” (Roma 12:11-12).

O le Sosaiete Fesoasoani, o le faalapotopotoga o Tina ma tamaitai i totonu o le ekalesia SISDAC, e amanaia tele o latou leo, ma e faamanatuina lo latou aso faapitoa e faatasi i le tausaga. O le tasi lea tino o le galuega e faatinoina le tele o galuega alofa e pei ona ta’ua ai le tasi soo fafine o Tapita i le nuu o Iopa, lea e ta’ua pe a faamatalaina o Toreka (Galuega 9:36), o loo fai ma faata’imuaga ma faataitaiga lelei o lenei Sosaiete i le tele o mea lelei ma meaalofa o loo faasafua atu ai lo latou agaga alofa ma le lē faatuaoia.

Auofisa Sosaiete Fesoasoani sa fai sao: Photo - Setiu Iakopo Tofilau

Auofisa Sosaiete Fesoasoani sa fai sao: Photo – Setiu Iakopo Tofilau

O le Sapati aso 1 o Setema, o le aso lea na loma ma tapena mamao iai le Sosaiete Fesoasoani a le SISDAC a Kuiniselani, e faatino ai polokalame o lo latou aso faapitoa, e ala lea i viiga o le Atua, o tala faale-Tusi Paia, faapea le tolaulauina o ripoti o galuega fai o lenei tausaga. O se tasi lenei o lālā i totonu o le matagaluega e lē o faatemutemu pe vaai laumata pe a oo ina iai se manaomia i se aiga, leitioa foi a faatusaina le Tina alofa e faamafola lona lima i le ua tigaina; ua tuu atu foi ona lima i le ua mativa. (Faataoto 31: 20).

O le lesona na folafolaina ai le Afioga Paia a le Atua e le susuga ia Pr Suemalo Pa’u’u, o le upu autu poo le lauga o le aso na saunoa iai le ta’ita’i ia Logomu Salesa, fofogaina o le Ripoti, faletua ia Emma Mao-Uka, faitauina o le Tusi Paia o Tuvao Siligi, ma le aoina o le taulaga, sa faatinoina e Elisa Toso.

O le faafeiloaiga ma le tatalo sa feagai ma le susuga i le toeaina ia Faamanu Sivao.

E faafā na usuia fonotaga a le Sosaiete Fesoasoani i lenei tausaga, asiasiga i maota gasegase a ekalesia taitasi i le aotelega e 57, ae faalua i ē na maliliu. E 9 sosaiete a le matagaluega e aofia ai Cairns, Bellbird Park, Leichhardt, Inala, Carole Park, Kingswood, Newtown, Annerly ma Southside. E 76 i latou uma mai sosaiete taitasi o loo resitalaina i le Matagaluega atoa a Kuiniselani.

O le auofisa o loo tutū mai le foe i lenei paeaiga mo le tolu tausaga, e aofia ai le Taitai le faletua ia Logomu Salesa; Failautusi: Emma Mao-Uka; Sui Failautusi: Tuvao Siligi; Faifeau: Pr Su’emalo Pa’u’u ma le toeaina ia Faamanu Sivao.

 Faifeau sosaiete Pr Suemalo & Fiapapai, Pr Johnny & Fitulua ma le taitai Matagaluega Pr Misa & Imo Matai’a: Photo - Setiu Iakopo Tofilau

Faifeau sosaiete Pr Suemalo & Fiapapai, Pr Johnny & Fitulua ma le taitai Matagaluega Pr Misa & Imo Matai’a: Photo – Setiu Iakopo Tofilau