E lē o faatamala le Malo o Samoa i le saunia o tulafono e lima taitaina ai le pulea o le nonofo ai i Samoa o tagata mai fafo e fia faia pisinisi i le atunuu, ma e aofia ai ma tagatānuu Saina ma isi atunuu Asia e ulufale i Samoa ona o le faatutu ai o a latou auaunaga tau pisinisi.
O le finagalo lea o le Palemia e tali atu ai i lipoti ma lagona faaalia o loo faitioina ai le Malo o Samoa i le leai o ni aiaiga faaletulafono e faatonutonu ai pisinisi a tagata mai Saina.
I le finagalo o le alii Palemia i auala o faasalalauga ua ia faailoa manino ai, o lana mātau e foliga e tulituli‘aupu e faitioga ma lipoti tagatānuu mai Saina, ae o loo toatele tagata o isi atunuu e pei o Niu Sila o loo nonofo i Samoa, ma fai ai a latou pisinisi.
Faaalia e Tuilaepa na te faauigaina ia faitioga o se faailogalanu ma faailogatagata auā na o Saina lava o loo agai i ai.
Na ia tali foi i popolega e faapea, e ono tutupu ni lagona lē fiafia ma aafia ai tagata faipisinisi mai Saina i Samoa i ni gaioiga e faaalia ai le lē fiafia o tagata.
Peitai o le finagalo o Tuilaepa, e lē mafai ona tutupu fua ni lagona faapea, ma e lē faatusatusaina foi vevesi na aafia ai tagata faipisinisi Asia i totonu o atunuu o Solomona ma Tonga, auā e lē tutupu ni vesiga faapea i Samoa.
O tulafono o loo faatonutonu ai pisinisi o loo faatutu i le atunuu e tagata mai fafo, na faailoa ai e le Palemia, e toatolu ni tagatānuu mai Saina ua taofia a latou pisinisi.
O lana faamalamalamaga e faapea, na logoina o ia (Palemia) e le matagaluega a le Malo o loo nafa ma le tuuina atu o pemita faigaluega i lo latou taofia o pisinisi a ia tagatānuu mai Saina e toatolu ona e leai ni laisene.
O pemita faigaluega na ave i ai sa faapea i latou o ni laisene pisinisi e pei ona saunoa le alii Palemia.
O le itu mautinoa e lē o faatamala le Malo i le mataituina o faaletonu faapea e pei ona aveesea foi ni tagatānuu mai Bangladesh na aumai e ese isi alii faipisinisi o lea atunuu e faatu se fale su‘isu‘i i Samoa.
Peitai na tuai aumai masini ma isi totoga e manaomia ma faapea ona faatonuina ai le toe aveesea ma le atunuu o le aufaigaluega mai fafo na aumai mo le faafoeina o lea taumafaiga tau pisinisi.
Faaalia e se ofisa sinia o le Malo e leai se seleni a le Malo na alu i le toe aveesea o ia tagata auā sa toe totogi lava e le alii faipisinisi na aumaia.
O nisi o ia tagata mai Bangladesh sa nofo totogi i nisi o aiga Samoa, ina ua aveesea ma le nofoaga sa faamautu ai i se vaega o Vaitele-tai, ina ua lē mafai e lē e ana le pisinisi ona totogi le lisi o le nofoaga sa faamautu ai.
