E faafetaia faiga faapaaga a Europa ma Samoa

O le faamanatu ai o le aso o Europa i Samoa nei, ua avea ma se avanoa e faafetai ai le Faalapotopotoga o malo o lea itu o le lalolagi i le taumafaiga a Samoa ina ia siisii lona tamaoaiga ma ia mafai ona savali i tuutuuga o le avea ai ma sui o Malo Aufaatasi aemaise o le faaleleia o le soifua manuia o ona tagata.
O le Iuni a Europa o se tasi lea o faalapotopotoga tele ua iloga le tele o lona sao i le atinae lautele o Samoa aemaise i le faaleleia ma le faasopolia o le Eletise i le atunuu, o le faaleleia o le suavai maua ma ia maua e tagata uma lea puna‘oa faalenatura. O le fausia lea o nofoaga mo aoaoga ma le itu tau i le soifua maloloina aemaise o le faaleleiga o galuega e pei o ala tetele ma isi.
O le sao lata mai lava o loo faagasolo ai le fesoasoani a lenei faalapotopotoga o le faamautu lea o nofoaga ua mafai ona maua mai ai le malosiaga faalenatura auā le gaosiga o le eletise, lea e galulue faatasi ai ma le Malo o Niu Sila.
O se fiafia na talimalo ai le alii ua avea nei ma sui o atunuu o Europa lea e ta‘ua o le EU i totonu o Samoa ma isi atumotu o le Pasefika, le alii ia John Stanley, na feiloai ai sui o le EU ua faamautu i Samoa mo galuega a lea faalapotopotoga, ma taitai o Samoa aemaise foi i sui o isi malo mai i fafo. E lei mamao atu nei na tatala ai le ofisa fou o le Iuni a Europa i totonu o le taulaga o Apia i tala atu o le faletalimalo o le Tanoa Tusitala.
O se laasaga fou ua faamausali ai foi ma le faatinoga o galuega a lenei faalapotopotoga i aoga ma nuu i totonu o Samoa. O le isi lea taulaiga o le galuega fesoasoani a Europa i le Pasefika aemaise i Samoa, o le faeleleia lea o atinae a nuu ma tagata taitoatasi.
Saunoa Stanley e faaali le mitamita i le vaaia o le alualu pea i luma o taumafaiga a Samoa, e pei foi ona see ese ai mai i tamaoaiga aupito pa‘ū o le lalolagi ae ua sesee mālie atu lava i luma lona sa i le itu tau i atinae o tamaoaiga taitasi.
E faafetaia foi le vaaia o le unai a Samoa i le itu tau i fefeaataua‘iga, le itu tau i le faaleleia o soifua maloloina aemaise o le itu tau i le faaitiitia o le ola mativa. Ua faafetaia ai foi le taumafai o Samoa e ausia manulauti o le Meleniuma lea e faagata uma i le tausaga fou.
O loo ua galulue foi lenei faalapotopotoga faatasi ai ma le aufaipopo a Samoa i le faagaioi ai o toganiu ma le popo maua auā le auina atu i maketi i fafo mo le faatau ai ma ua mae‘a asiasiga a sui o lea faalapotopotoga i Upolu ma Savaii atoa, ina ia mafai ona talanoa i le au fai toganiu e faaleleia le tulaga o le popo maua auā o lea ua agai lenei faalapotopotoga e unai maketi mo isi oloa e gaosi mai i le popo mo le faatau atu i fafo.
O le alii Palemia o Samoa na faafetaia lenei faalapotopotoga ma lana foi fesoasoani tele i le tulaga ua iai Samoa ma ana atinae aemaise o le taumafai ina ia faaauau lenei faiga faapaaga i le agai i luma.